عاممقالات

كيف تخسرين زوجك في 15 خطوة بقلم رانيا السيد

كيف تخسرين زوجك في 15 خطوة 


1_خليكي زنانه ما تعطيهوش فرصه يتحرك خارج دائرتك، كل خمس دقايق تليفون مالوش لازمه ولازم لما يرجع يقولك كان فين ومع مين وكانوا بيقولوا ايه. 
2_اهملي في نفسك وفي بيتك وفي اولادك واهملي كل متطلباته.. بلاش بيرفيوم (بيخنق) بلاش ميك اب.. بلاش لبس حلو.. مالها الجلابيه؟ 
3_خليكي سليطه اللسان وماتفوتيش كلمه إلا لما تردي عليها رد لاذع واتعاملي بأسلوب النديه معاه…. محدش أحسن من حد. 
4_ارهقيه ماديا بمتطلباتك الضرورية والغير ضرورية واللي تفوق قدراته الماديه…. ومهما جاب اوعي تبيني أن فيه حاجه عاجباكي. 
5_ما تفوتيش فرصة إلا لما تعايريه أو تقارنيه بأزواج صديقاتك ونغصي عليه عيشته وحسسيه دايما انه مقصر وإنك نادمه على الارتباط به. 
6_خليكي دائمه الشكوى من أهله خاصة أمه واخواته وما تضيعيش فرصة إلا لما تغلطي فيهم وتسخنيه عليهم. 
7_اوعي تطوري أو تثقفي نفسك خليكي زي ما انتي كده….. الجهل بيطفش الرجاله. 
8_لو بتحبيه خليكي طابقه على نفسه ومدلوقه وما تعطيهوش فرصه يشتاق لك…. كرهيه في الساعة اللي حبك فيها وكرهيه في الحب نفسه. 
9_اوعي تسمعي كلامه وتحافظي على رشاقتك زي صافينار أو هيفاء.. الناس دي وحشه…. ياختي كلي وربربي كده ده التخن عز وصحه…. اومال مين يأكل حله المحشي؟ 
10_بلاش الصراحة والوضوح معاه…. اكذبي شويه، وخبي عليه شوية، واخرجي من غير ما يعرف ولو رايحة لصاحباتك قوليله إنك عند دكتور الأسنان أو عند الخياطه وكده.
11_لو قالك يمين إنتي على طول من غير تفكير روحي شمال، اوعي تسمعي كلامه لاحسن يستضعفك. 
12_خليه لما يدخل البيت كأنه داخل على واحد صاحبه… يعني راجل زيك زيه…. مفيش حد أحسن من حد. 
13_خصصي يوم في الأسبوع للخناق وممكن تسيبيله البيت في اليوم ده…. نكدي عليه قبل ما ينكد عليكي. 
14_محفظته وموبايله لازم يبقوا تحت السيطرة….. حاسبيه على كل جنيه، وموبايله بقى لازم تعرفي بيكلم مين والباسوورد لازم يكون معاكي….. الاحتياط واجب. 
15_لو فكر يعترض على أي حاجة بتعمليها معاه…… ارمي بلاكي عليه وروحي اعمليله محضر في القسم…. وريه العين الحمرا.
# رانيا_السيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: