عاممقالات

قصة محاربة

قصة محاربة
انا اسمي سالي وعندي دلوقتي 27 سنة واتخرجت من تجارة انجايزي جامعة عين شمس وانا عندي عشرين سنة يعني من سبع سنين بالظبط سنة 2009 وطبعا لاني تعليم حكومي طول عمري وجبت في الثانويه العامة 94% وتنسيقي خو اللي دخلني تجارة وانا كان نفسي ادرس صيدله رضيت بالامر الواقع واتخرجت من الكليه بتقدير جيد ولاني مافيش واسطه عندي زي اصحابي اللي في منهم اتعينوا في بنوك واحنا لسه بندرس في الجامعه بالواسطه ومش بقول كده علشان اقول ان انا qualified وما حصلتش بالعكس انا عاديه جدا بس حابه اقول ان الواسطة ممكن تعمل كل حاجه وبعد ما اتخرجت قعدت لفيت في كل الشركات والمؤسسات الحكومية والبنوك وما اشتغلتش وقامت الثوره بعد التخرج بسنتين والدنيا اتقفلت اكتر والواحد بقى مضغوط طول الوقت بظروف البلد وبالبطاله ولكل حاجه حوالينا ولاني من النوع اللي مش بيعرف يعبر عن نفسه حتى ماكانش عندي اي اكاونت على الفيس بوك ولا كمت بعرف اعبر عن غضبي كنت بكتم في نفسي لغاية سنة 2012 بدات اتعب جامد في اولها واحس انا انا مش مظبوطة وادوخ كتير وفقدت شهيتي وعلى نص السنه الوجع بقى بيزيد وفي شهر اكتوبر لقيت شغل وقلت الحمدلله فرجت ولكن ماقدرتش اكمل فيه اكتر من يومين لان صحتي كانت بتتدهور وابتديت معرفش انام ولا اتقلب على جنبي اليمين ورجلي وظهري الوجع فيهم بقى جامد ورحت عند دكتور عظام قريبنا وقالي مافيكيش حاجه ومحتاجه تروحي الجيم وتتحركي اكتر وكتبلي على فيتامينات
وبعديها بكام اسبوع رحت مع اصحابي دريم بارك واول لما رجعت من هناك حسيت بتعب رهيب ورجلي ابتدت تتقوس وماعرفش ادوس عليها فرحت عند نفس الدكتور لانه قريبنا وقالي مافيش حاجه وكتبلي على اشعة وطلعت وقالي مافيهاش حاجه وكملت على كده وفي نص سهر 12 الوجع بقى لا يحتمل ومافيش لانوم ولا اكل خالص وظهري من منطقة الحوض ورم والورم بقى ظاهر في ظهري فدورت على دكتور تاني ورحت لقريبي برده علشان يشوفني وانا حالتي كده فقالي مافيكيش حاجه وقال لامي ماتوديهاش عند دكتور تاني وهي مافيس فيها حاجه وكنب لي على فيتامينات ورحت عند دكتور عظام تاني واول لما شاف ظهري طلب مني اشعةxray و ct على الحوض وعلى صدري
ابقي قوليلي رايك علشان اعرف اكمل ولا لا
ودكتور العظام قالي ساعتها مش همشي غير لما تعملي الاشعة وكنت انا وبابا وماما في المستشفى ولما النتيجة طلعت ورجعت للدكتور قالي لوسمحتي اطلعي انت ومامتك برا وخلي باباكي بس وانا اتخضيت وما رضنش اخرج والدكتور صمم واضطريت اخرج
وبعد شويه الدكتور ناداني ولقيت بابا عينه مدمعه وساكت والدكتور بيقولي لازم تعمليmri على الحوض و ct على صدرك وطلعت من عند الدكتور على مركز الاشعه وبابا كل ده ساكت ومدمع واول لما وصلنا المركز لقيت بابا بيعيط وبيقولي جالك الورم من ايه وانا وماما مصدومين وجالي ساعتها قوه غريبه وحاولت اهديه وقلت له ان شاء الله خير وهتبقى حاجه بسيطه ودخلت عملت الاشعه وخرجت لقيت قريبي مستنيني وكان دكتور وبيطمني ورحت البيت لقيت اخواتي واصحابي واهلي جم وكلهم مصدومين ومش مصدقين وحاولت ابين انا انا كويسه مه اني من جوايا منت مرعوبه بس قلت لنفسي في جميع الحالات خير وانا راضيه بقضاء ربنا وقدره وطبعا كان يوم حزين جدا على اهلي واصحابي وتاني يوم لما الاشعه طلعت بابا قالي خليكي مرتاحه واخد الاشعه وراح عندالدكتور وقاله الدكتور لازم تعملmri على الحوض و ct على صدرها
ولازم تتحول لدكتور جراحة عظام ورحت مركز الاشعه تاني وعملت الاشعه المطلوبه وطلعت على دكتور الجراحه وقالي لازم اعمل pathology اللي هي اخد عينه من الورم علشان اشوف نوعه واشوف هو حميد ولا خبيث والايام دي ماكنتش بقول غير يارب يطلع حميد واتطلب منيbone scan كمان وطبعا كل اللي عمل pathologyعارف اد ايه هي متعبه وساعاتها لفيت على اكتر من دكتور جراحة عظام علشان يديني اي امل لان تحليل العينه بياخد اسبوع وطبعا دكتور الجراحه في الفتره دي حولني على دكتور اورام ورحت عند دكتور الاورام وساعتها اداني الصدمه وقالي ان الورم هيطلع خبيث مش حميد وان انا لازم ابدا كيماوي حالا وقالي هيطلع اسمهewing sarcoma او osteosarcoma وان ده18 جلسه كيماوي والتاني 21 جلسة كيماوي غير الجراحه
كملي
طبعا ساعتها انا انهارت وماقدرتش امسك نفسي من العياط وقلت له هستنى نتيجة المعمل ومش هبدا دلوقتي ومشيت من عنده وانا منهاره والدموع عماله تنزل من عيني والدكتور ساعتها قالي انا هكلم المعمل يسرعوا النتيجه لانك حالتك متاخره ولازم نبدا وطبعا قلت الدكتور ده بيتكلم غلط ورحت عند دكتور تاني ولكن نفس الكلام واضطريت استنى الاسبوع وكان اسبوع طويل كله قلق وخوف ورعب وبدعي ربنا ان كلام الدكاتره يطلع غلط ويطلع ورم حميد مش خبيث وبعد الاسبوع ما خلص طلعت النتيجه واتكتب نوع تالت خالص اسمه كارثينوما وطبعا كل الدكاتره قالولي ان نتيجة التحليل دي غلط وان pathology لازم تتعاد وطبعا زي ماقلت ان اخد العينه كان صعب جدا وخصوصا في تاني مره واني اخدتها من غير بنج واضطريت اعيدها ووديتها لمعملين تانيين وكل معمل طلع نتيجه شكل وساعتها كنت هتجننن وكنت بقول لنفسي مش هبدا كيماوي من غير ما اتاكد من نوع الورم ده حتى حرام وساعتها كنت استقريت على دكتور وليد عبيد وبدات اثق فيه وهو دكتور جراحة اورام عظام وقالي انا هقعد مع الدكاتره بتوع المعمل واتكلم معاهم واقنعني اني لازم ابدا وان في دواء مشترك في الكيماوي لازم ابدا بيه وان هو كمان عياخد العينه ويبعتها امريكا علشان ايقى متاكده وهنا بدات رحلة علاج طويله
وبعد ما دكتور وليد عمل كونسلتو وقعد مع الدكاترة اتفقوا انها osteosarcoma وبدات اول جلسة كيماوي وكانت الجلسه 3 ايام والمحاليل متركبه24 / 24 وطبعا ابتديت ادوخ وارجع ويحصل التعب الطبيعي اللي كل اللي اخد كيماوي زي وزي مها الاشرف عارفه وبيحس بيه وبعد اسبوعين جه ميعاد الجلسة التانيه والمرة التانيه الجلسة كانت اصعب لانها لتاثر على انزيمات الكبد والكلى وكانت خمس او 6 ايام وبردو 24 ساعة المحاليل والادوية متركبه واخدت الجلسه وكان لازم اعمل تحليل بعدها علشان اطلع من المستشفى يومين وارجع اعيد نفس الجلسة وعملته وطلع كويس وطلعت ولكن قبل اليومين مايخلصوا عملت تحليل انزيمات الكبد والكلى وطلع مرتفع فبدات اخد علاج للكبد والكلى والجلسة التالته اتاخرتلغاية لما الانزيمات اتظبطت ودخلت الجلسة التالته وقعدت اسبوع في المستشفى وكان المفروض اريح اسبوعين وادخل الجلسة الرابعة واكن في وسط الاسبوعين حالتي اتدهورت وما بقيتش بقدر اقوم من السرير خالص والوجع زاد واضطريت اكلم الدكتور ةكتب لي على مسكنات قويه وفي ميعاد الجلسة الرابعه شالوني وودوني المستشفى وبالمناسبة انا منت بتعالج الاول في مستشفى السلام في المهندسين ولما لقيتها مش كويسه اتنقلت معهد ناصر بس طبعاprivate لاني ماليش تامين صحي والدكتور كنت بشوفه دايما في السلام لانه كان بياخد نسبة ولكن لما اتنقلت معهد ناصر مابقيتش بشوف الدكتور وبقى في اهمال جامد من النواب بتوعه والتمريض طبعا في مصر كل اللي اتعامل في مستشفيات وخصوصا حكوميه عارفهم وعارف معاملتهم حدث ولا حرج بصراحة واول ما دخلت معهد ناصر علشان اخد الجلسه الرابعه وانا تقريبا بموت لقيت دكتور الاورام بتاعي مسافر والنواب مش عارفين يعملو ايه فاهلي كلموا دكتور وليد عبيد وطلب mri بسرعة وقال اكمل الجلسة
ولما نتيجة mri طلعت اخدوها للدكتور وليد وقال ان العمليه استحاله تتعمل في مصر وان هو بقاله كام شهر بيتفق مع دكتور في برمنجهام على السفر لان العمليه لو اتعملن في مصر هيبقى فيها خطر على رجلي وممكن يحصل بتر وانا ساعتها انهارت وكانت حالتي متاخره خالص دايما منيمني ومركبينلي قسطرة ومافيش حركه خالص والورم كان ليكبر لدرجة انه كل الحوض اليمين كله وبدات إجراءلت الفيزا وانا مستمره في جلسات الكيماوي وبعد كام اسبوع الفيزا اترفضت علشان كان لازم نبعت الفلوس كلها كاش واحنا ماكناش عارفين ولما اهلي كتر خيرهم سحبوا الفلوس كلها بعتوها علاطول وجات الفيزا وسافرت انا وبابا انجلترا وانا في حاله تقريبا خلصانه وكان وزني ساعتها 40 كيلو
وطبعا كنت بعاني في الطياره والمطار ولكن ربنا قواني ووصلني هناك وكان استغرابهم في المطار والمستشفى ازاي امي مش معايا كنت بقولهم علشان انا مصريه وفي فيزا والاجراءات صعبه كانوا ليستغربوا اكتر ودخلت المستشفى وقابلت دكتور مصري ودكتور جراح عدانجليزي هناك وقعد يكلمني عن العمليه وخطرها وكل حاجه فقمت قلت له يا دكتور هو انا في حل تاتي بالنسبة لي قالي لا فقلت له خلاص وعرفت كمان ان المستشفى كلها مش هيتعمل فيها عمليه غير عمليتي يومها لان العمليه كبيره جدا وجه يوم العمليه وعملتها وخرجت على العنايه المركزه وقعدت فيها 3 ايام وكان الفتح واخد بطني وظهري ورجلي اليمين لانهم شالوا الحوض كله وزرعوا مكانه عظمه اخدوها من رجلي اليمين
وخرجت بعد كده من العناية وقعدت اسبوعين 5ي المستشفى وبعد كده الجرح فتح جامد والحالة باظت وبداوا يستخدمزوا كل الطرق علشان يوقفوا النزيف وقعدت على كده شهر لغاية لما رجعت مصر وانا جرحي مفتوح وتابعت مع الدكاتره هنا واستنيت لغاية لما جرحي يقفل ولكن قبل ما ابدا كيماوي تاني عملتpet ct واكتشفت ان الورم رجع تاني فاضطريت اغير الادويه الكيماويه وغيرت كمان الدكتور والمستشفى وبعد اربع جلسات الكيماوي ماشالش الورم بس كانت نتيجته في المرة دي 20% وفي المره الاولى كانت 0 % وبعد كده عملت العمليه تاني ولكن المره دي كانت في مصر ومع دكتور وليد عبيد وبعد كده الدكاترو اختلفوا اخد اشعاعي ولا لا فما اخدتش وحالتي ابتدت تتحسن ولكن بعد فتره المسامير مكان العمليه ابتدت تطلع برا جسمي وتشوكني فدخلت عمليات لتالت مره وكانت دي اخر مره ادخل عمليات وانا الحمدلله دلوقتي ماعنديش ورم وبقدر امشي بس المشكله ان حصلي اعاقة ورجلي اليمين بقيت اقصر من الشمال ومعووجه ومعايا شهادة اني بقيت من ذوي الاحتياجات الخاصة ونفسي الاقي شغل وياريت لو حكومي وابقى من 5% واتعين ويبقى اي شغل محترم ويناسب ظروفي وفي الاخر احب اشكر كل الناس اللي وقفت حنبي وساعدتني من اهلي واصحابي واحب اشكر مها الاشرف لانها خليتني اكتب وهتنشر لي القصة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: