كلاهما مر.
مشاكلنا في الحياة كتيرة ومابتخلصش لكن الظروف أحيانا بتحطنا مابين أختيارين كلاهما مر لكنه الأصح والأصلح ودي مشكلة من السأله ن أ :
صباح الخير استاذه هويدا اتمني حضرتك تقرأي قصتي للأخر واسفه للاطاله ولكي جزيل الشكر وتعطيني رأي لمشكلتي لانها تعباني نفسيا جدا وسألت فيها الكثير من المشايخ بعضهم قال أصبر والأخر قال أتطلق انا عايزه رأي اخوي مش رأي دين ولا مجتمع رأي حياه لان انا نفسي مش عارفه اختار مشكلتي زوجي مهندس كهرباء لكن ملوش حظ في الشغل وده سبب ليه ضغط نفسي فظيع دخل بسببه 4مصحات نفسيه لان بيجيله حاله اني اعوذ بالله زانيه وابني الصغير مش ابنه بقالنا 5سنين متجوزين والحاله دي بقالها 4سنين وعلي فترات ممكن شويه كويس وممكن يقلب وصبرت وبقول غصب عنه وماحدش يعرف بمرضه غير اهله وكانوا بيقفوا معايا لكن هو مابيكملش علاجه في كل مره وكنت بحاسب علي تصرفاتي عشان مايجلوش الشك ده لأنه رمي عليه يمين ورده وبعدها دلوقتي بقي أصعب من الاول وبعتني عند اهلي وقالي هطلقك وحرق كل هدومي وحاول ينتحر ويرمي ابني بس الحمد لله لحقوه ودخلوه مصحه في شهر رمضان اللي فات قعد شهر وطلع وكان عايزني اكمل معاه اهلي طلبوا منه يكمل علاجه الاول فافضلت عند اهلي 6شهور ورجعت قعدت اسبوع بالظبط ورمي عليا يمين تاني وطردني المره دي بقي رمي نفسه حصله كدمات وكسر في رجله بعدها اهلي عايزني أطلق رسمي مش عارفه استحمل عشان خاطر الولدين وانه مريض واصبر عليه ولا اسمع كلام اهلي واطلق والمصحات النفسيه اجمعوا انه مريض فصام ووسواس قهري ، واهله بيحاولوا معاه عند الدكاتره وماشيين حاليا مع ناس بيقولوهم عليه ملبوس ومعمول ليه عمل ، أطلق دلوقتي ولا أصبر عليه وانا في حيره شديده رأي حضرتك أيه؟
السأله الكريمة الرد علي مشكلتك
تطلقي وتنجي بأولادك عشان تقدري تربيهم في هدوء ويكونوا اسوياء خصوصا أن تواجدهم مع الأب في مكان واحد بيعرضهم للأذي وفيه خطوره علي حياتهم وحياتك ومن غير ما تقوليلهم حاجه عن الحالة أللي بيمر بيها والدهم دايما اتكلمي عنه بكل خير وعشان تكوني علي علم في بعض الحالات النفسية بتاخد فترات طويله في العلاج وأحيانا بتفضل ملازمه صاحبها العمر كله ، وأسأل الله لكي صلاح الحال.
