عام

بنت الأصول.

بنت الأصول. 

بريد القراء أعداد: هويدا صابر
المواقف بتبين ولاد الأصول ، ومهما حد جه عليهم مش هيتعاملوا غير بأصلهم وأخلاقهم أللي أتعودوا وأتربوا عليها من الصغر ، لكن هنقول أيه في مواقف بتحتاج حسم وشده لأن الطرف التاني بيستغل طيبتهم وأخلاقهم ويجي عليهم ولا بيفرق معاه حد حتي لو كان من لحمه ودمه لأنه أنعدم الضمير .
ودي مشكلة السائلة ر م:
أنا مطلقه من 7 سنين وعندي ولدين وبشتغل لكن أللي جاي علي قد أللي رايح وابوهم مبيصرفش عليهم ، ورفعت عليه قضايا علشان المصاريف بس سنتين في المحاكم من غير نتيجه وبعدها وصلنا لحل ودي أنه يبعت لأولاده 250 جنيه في الشهر بقي يدفع شهر وشهرين لأ ، ودلوقتي بقاله تسع شهور مبيبعتش الفلوس ورغم كده بيجي ياخد أولاده عشان يشوفهم أصل أنا مقدرش أمنعهم عن أبوهم ، ولما سألته عن الفلوس قالي مفيش معاه وأتحجج بالظروف رغم أنه مبسوط وعنده محل وعربيه وبيت وأرض هو متجوز وعنده أولاد من زوجته التانيه ، والناس بتقولي حرام عليكي دا حق أولادك ، وأولادي مش عايزين منه حاجه ، وأنا أتنازلت عن القضايا عشان خاطر أولادي ميقولوش بيني وبين أبوهم قضايا ، وعشان يفضل يسأل علي أولاده ميبقاش لا فلوس ولا أب كمان ، وأنا محتاره مش عارفه أعمل أيه ممكن تقوليلي وأسفه 

السائلة الكريمة: أنتي بنت أصول وبميت رجل وراعيتي عشرة أنسان مش مراعي ربنا في أولاده وخوفتي علي مشاعر أولادك هيقولوا أيه عليه ونزلتي وأشتغلتي عشانهم ، وبعتذرلك مع أني مبحبش البكاء علي اللبن المسكوب أنتي أتسرعتي لما أتنازلتي عن القضايا لأن دا حق أولادك فعلا وهو غير أمين عليهم ، وهو دلوقتي منعه تقريبا بشكل نهائي بدليل بقاله 9 شهور ولا فارق معاه وبيتحجج ، أي حد من قرايبك يتواصل معاه مره وأتنين وأكتر يمكن ربنا يهديه ويلين ولازم تلجأي لمحامي في حالة رفضه تستشيريه ، ورأي الشخصي أن أولادك يشوفوه عادي أصلهم ملهومش أي ذنب وعشان نفسيتهم متتأثرش بسبب أب معدوم الضمير والرحمه ودي من المشاكل أللي بتعاني منها أمهات مطلقات كتيره للأسف ، وربنا يرفع عنك ويصلح أحوالك ويبارك في أولادك.أني طولت عليكي.

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock