عاممقالات

حكايه مسجد شاهين الخلوتى

كتب . د. حامد محمد 

مش حقيقي إن كل المماليك أصلهم أسرى حروب ، أو أطفال اتخطفوا من أهاليهم و اتباعوا في مصر، الحقيقة المحزنة إن أغلب المماليك اللي وصلوا مصر و هما أطفال أهاليهم هما اللي باعوهم بنفسهم لتجار الرقيق تحت ضغط الظروف الاقتصادية الطاحنة ، و في حالات تانية كان الشباب الأحرار بيقدموا نفسهم للنخاسين عشان ياخدوهم و يبيعوهم في مصركمماليك , باعتبار إن فرص أي مملوك في مصر أكبر بكتير من فرص البني آدم الحر 


المماليك اللي كانوا بييجوا مصر و هما كبار كان بيتقال عليهم (جلبان) الجلبان كانوا مصدر دوشة مستمرة في مصر، المماليك اللي بييجوا و هما أطفال كانوا بيتربوا تربية مفتخرة بتخلي عندهم نوع من الانتماء، يجيبولهم فقيه يعلمهم القراية و الكتابة و الدين ، و يدربوهم تدريبات عسكرية مكثفة ويأهلوهم للمناصب الكبيرة في البلد، أما الجلبان فكانوا مجرد مرتزقة ، السلطان من دول بيشتريهم عشان يقوي نفوذه قدام المنافسين ، و لو مات السلطان يورثهم السلطان الجديد  و هكذا و أهو شاهين الجركسي كان واحد من الجلبان دول 

ايه اللي شقلب كيان المملوك شاهين في مصر ؟ محدش يعرفالمملوك اللي جاي من آخر الدنيا  وغالباً باع نفسه عشان يبقى من مماليك السلطان قايتباي وكل الفرص و المناصب سككها مفتوحة قدامه  ووارد جداً الزهر يلعب و يوصل لحكم مصر في يوم من الأيام ، ساب ده كله و قال مش لاعب .

في لحظة تجلي كده راح للسلطان قايتباي وقاله اعتقني لوجه الله و الغريب إن قايتباي المعروف ببخله الشديد وافق إنه يتخلى ببساطة عن واحد من مماليكه الجلبان اللي دفع فيهم دم قلبه.

ومن ساعتها ساح شاهين في البلاد وراح ايران شوية و بعدين رجع عمل لنفسه مقبرة و خلوة يعبد ربنا فيها مع نفسه كده في جبل المقطم حاجة كده تشبه لقلايات الرهبان و فضل في خلوته على الحال ده 47 سنة علشان كده سموه الخلوتي وابنه جمال الدين شاهين هوة اللي بنى المسجد ده مكان الخلوة بتاعت أبوه .


اللي يشوف مسجد شاهين الخلوتي من بعيد غالباً هيتعجب من موقعه المدهش اللي زي ميكون نابت من جبل المقطم أما لو قربت منه فمش هتحس غير بالرهبة و الخشوع و

إذا كان المكان مقطوع بالشكل ده دلوقتي أمال كان عامل ازاي أيام شاهين الخلوتي من 500 سنة !


كل اللي خطر في بالي قدام المسجد إن شاهين الخلوتي باع كل حاجة في الدنيا عشان يفضل عايش في لحظة الخشوع دي على طول .

المسجد مش باقي منه غير أطلال حالياً و يوم عن يوم حالته بتسوء , ملّوا عينكم منه كويس و انتوا ماشيين في الأتوستراد علشان غالباً هينهار قريب على دماغ أهالي الأباجية اللي عايشين تحته بالظبط .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: