عام

المحسوده.

بريد القراء أعداد: هويدا صابر
لما ربنا يكرمك ويعوض صبرك خير ، أو تكون من المحظوظين في الدنيا وينعم عليك ربنا بحاجات مش عند غيرك أللي في نفس ظروفك بدل متقول الحمدلله ، تفسد فرحتك بكل دا وتعكر صفو حياتك بأنك ليل نهار شايف نفسك محسود محسود والناس مركزه معاك وأللي يسألك عامل أيه؟ وأخبارك أيه؟ بدل متقول الحمدلله تقول كنا عيانين وهنموت وربنا نجانا في أخر لحظه مبنفوقش والله والعربيه كل يوم تتخبط وأنا كمان خارجه من باب أوضتي أمبارح وقعت علي وشي مش عارفين في أيه ، لكن أحنا بقي عارفين في أيه تعالوا نشوف.
دي مشكلة السائلة رص: 
أنا متزوجه وعندي 29 سنة الحمدلله ربنا رزقني بزوجي وسيم جدا وغني وتعليمه أعلي مني أنا معهد سنتين وشكلي عادي مقبول وهو تعليم عالي ومحاسب في أحدي البنوك الأجنبيه ، ومحترم جدا ، مشكلتي أن الناس بتحسدني عليه في وشي وألاقي أللي بيقولي يا مبخته أو يامحظوظه ، وأللي تقولي مفيش واحد زيه لبنتي ، بحس أنهم مركزين معانا جدا ، لدرجة أن حالنا بيقف أحيانا بسبب القر والحسد وبقالي 6 شهور متجوزه ومفيش حمل وأحيانا بخاف حياتي معاه تبوظ لأني معظم الوقت بكون عصبيه لما بحس بتركيز الناس معانا وخصوصا بعض أقرايبه ، ومنعت صحباتي من دخول بيتي ، وأغلب الوقت مبقولش أي حاجه كويسه عن حياتنا ، وأنا نفسيتي تعبت بصراحه وأكتئبت أعمل أيه؟
———————
السائلة الكريمه: أنتي طبعا هتستريحي جدا لما أقولك أنتي محسوده ولازم تلبسي دلايه زرقا في رقبتك كبيره تاخد العين ، وداري جوزك عن عيون الناس وبرافو عليكي أنك منعتي صحباتك من دخول البيت ، أحنا مش عايشين في الدنيا لوحدنا والحسد زي ما هو مذكور في القران بردوا معروف العلاج ، وبعتذرلك جدا وأرجو أن كلامي ميكونش تقيل عليكي ، أنتي أللي مركزه مع الناس بزياده مش هما أللي مركزين معاكي وأللي بيحصل معاكي عادي بيحصل مع غيرك وغيرك ومش كل كلمه بتتقال نحكم عليها أنها حسد أنتي ممكن في يوم من الأيام كنتي بتقولي لغيرك كلام زي دا وأكتر ، وأنتي مبهوره بزوجك بزياده ومش مصدقه نفسك أنك أتجوزتي شاب وسيم وتعليمه أعلي منك دا وغني والناس هتحسدني عليه وكل صحباتي ، ودا للأسف معناه أنك شايفه نفسك قليله عليه ودا في حد ذاته هيعمل مشاكل كبيره بينكم منها مثلا مجرد تواجدكم في مكان في بنت أجمل منك من قرايبه او قرايبك أو تعليمها أعلي أتكلمت معاه أو سلمت عليه هتقلبي الدنيا وهتتعصبي وهيبان علي وشك وأحتمال كبير تتصرفي بطريقه فيها غباء وعدم أحترام ليه وغير مقبوله لزوجك وهتسببله أحراج ، الست لازم تكون واثقه من نفسها ، فلازم تفوقي لنفسك وتتعاملي معاه بحب وبثقه وأحترام بدل متخسريه بسبب تركيزك مع الناس بصولي قالولي حسدوني ، ركزي في حياتك ومعاه وشوفي واجباته كزوج وأحتويه ومتبصيش للموضوع بسطحيه ، والحمل دا رزق وبأيد ربنا وبعدين أنتي بقالك 6 شهور مش كتير وممكن تروحي للدكتور ، لكن تعيشي في هاجس أنا حملي أتأخر من الحسد والقر دا شئ مبالغ فيه منك ، وربنا يصلحلك أحوالك ويرزقك بالذريه الصالح.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: