طارق العمري
فى الدنيا دى …
الواسعة أوى
و برغم وحشة غربتى
بالقانى دايماً
من حضورِك بارتوى
و أعمل مراكب شمس
من نظرات عنيكى
تسافر البحر البعيد
و تجيبنى عندك مُكتوى
واضح ف عشقى من زمان
لا باكون جبان
و لا عمرى مرة إخترت أمشى
ف الطريق الملتوى
ف الدنيا دى ….
جرَّبت كل اللي إنْحَكَى
و سمعت كل اللي إشتكى
لو كان سفيه أو كان سَوِى
ماعرِفت أكَوِّن فكرة
عن معنى الغرام
و الناس مَرَايا دائماً
فيها المُحَدَّب و المُقَعَّر
بس فيها المُسْتَوى
و طلِعت من كل التجارب مبتدئ
خالى الوِفاض من خبرتى
و بريئ أوى
و عيونى شافت فيكى غير
تاهت خطى القلب الكبير
و تقاطعت كل الطرق
و لا فيش معاهم خط سير
و العقل قاعد مُنزَوِى
ما بقاش بيؤمر ف الكيان
و الحالة توصيفها الجنان
بس الحنان
غالب على كل البدن
و الروح لروحك تحتوى
ما لقيتش توصيف أوصفه
غير شيئ ما تِقدر تصرِفه
حاكم جوارحى كلها
خالِق حاجات مِرتاحلها
حلوة أوى
و لقيتنى شايفك كل يوم
بتشيلى من روحى الهموم
ما بقيتش أفَرَّق
بين عيونك و الحياة
بيجينى من كل إتجاه
إحساس بإنك … دنيتى
الواسعة أوى
مدير قسم الأدب والشعر
علاالسنجري
