بقلم : محمود منصور
المصري .. الواد الأسمر اللي الشمس نحتت تفاصيل وشه و كتبت عليه الجدع الشهم ابو دم خفيف ..
الواقف دايما ضد الظلم و كف أيديه ابيض و شريف ..
مهما الزمان قسي عليه او لما الدنيا ضحكتله قلبه زي ما هو ابيض و نضيف ..
تشيله بلاد و يقابله عباد …. ايشي ابيض وايشي أشقر و ساعات أفريقي كأنه سندباد
يكسر حواجز الزمن و يهد صخور الحياة تنزل فتافيت مفتفتة يجمعها و يبني منها مسلات
يقول للكون انا مصري زارع من مية النيل و باني جنبها اهرامات
تسلم إيدك يابوالهول ياللي بتفطر طعمية و فوووول
فجاءة الواد تاه و مش عارف راسه من رجليه
هو انا انا و لا هو بقي انا و لا انا بقيت مش انا
ليه زماني رماني و اول ضربة جت من جيراني
يمكن ظروفي بقت مش اللي هية والدنيا اتنططت عليا ..
بس عااااادي يا دنيا مش هاسكت و لا استسلم ولا أحط كفي علي خدي وأقول انا مش عارفني انا تهت مني .
لاااااااا وألف لاااااااااااا
انا هاقوم و اشمر دراعاتي و أقول يا رب ياللي بالخير باسط ..
خليك معايا و قويني ارجع احسن من الاول وكفاية بقي عم عبد الباسط
