أدم وحواءعام

إجتماع أولياء الأمور


كتب
محمد علي
كل سنة و إنتم طيبين 
يأولياء الأمور يا فاهمين يا واعين 
و يا ولادنا يا مستقبلنا يا حلوين يا شاطرين 
و عام دراسي جديد يارب يكون سعيد 
و يكون من حيث المستوى التعليمي و التربوي صالح و مفيد 
و كل لاحظ هذا العام إرتفاع مصاريف المدارس
و طلعلنا حاجة كده منعرفش طلعت منين إسمها “Supplies List “
و دي ورقة كده طويلة مليانة طلبات للمدارس 
ده غير مصاريف الباص و اليونيفورم و الأستيكة إللي بتفرقع فالظلمه 
و كل ده كوم و مصاريف الدروس و مصروف العيال
و الملازم و الكتب و النصب إللي بيتم تحت مظلتهم 
بما يسمى بال ” المصالح و الحوارات “
عشان كده الضحية الأولى للتعليم فى مصر هم أولياء الأمور 
أنتم جزء من المشكلة و جزء من حلها 
أنتم عليكم الجزء الأكبر فى إصلاح التعليم 
إنتم الحل و إسئلني إزاى … ؟
أولاً : إفهم إن إبنك لازم يتعلم صح و إن الدرجات مش كل حاجه 
أهتم إن إبنك يحصل العلم و المعرفة و يكتسب الخبرات و يمارس التجارب المختلفة
ثانياً : كفاية دروس خصوصية على الفاضيه و على المليانه 
خلوا عيالكم يعتمدوا على نفسهم و الإنترنت مليان دروس شرح و تفسير 
علمه إزاى يدور على المعلومات و هم عارفين لكنهم بيستخدموا فى الغلط و بس 
ثالثاً : إنتم كمان بتحبوا تتنمظروا بعيالكم و ده مينفعش 
أنا إبني مينفعش يدخل بكتب قديمة أنا إبني مينفعش مياخدش دروس إنت عايزهم يسقطوه 
اللانش بوكس و الشنطة إللي بتنور فى الظلمه بجد مينفعش 
رابعاً : تأكدوا من سلامة طريق ولادك من و إلى المدرسه 
الواحد بيشوف كوارث فى المواصلات عيال بتجري وسط العربيات 
و عيال بتتشعبط و عيال بتنط فوق اي حاجه ماشيه 
كوارث …. خدوا بالكم من ولادكم 
خامساً : فهموا ولادكم إن المدرسة للتعليم و تحصيل المعرفة 
عرفوهم حقوقهم فى التعليم علموهم يتعبوا المدرسين أسئلة و طلبات للتوضيح و مراجعه 
شجعوهم على ممارسة النشاط جوه المدرسة لو فى نشاط 
لو مفيش خليه يمارس نشاط كل أسبوع على الأقل 
فى مكتبة او نادي أو مع المسجد أو فى الكنيسة أو فرحلة يعرف فيها بلده و تاريخه 
سادساً : عودته ميحافظش على حاجته لأنك كل سنه هتجيبله غيرها 
علمه يحافظ على أدواته و كتبه و كل حاجته عشان يستفيد بيها بعدين
هو أو حد من أخواته أو قرايبه أو جيرانه 
سابعاً : ولادك هم مستقبلك هم إستثمارك الحقيقي هم مستقبلنا كلنا 
يجماعة ولادنا أبسط حقوقهم هى التعليم الجيد 
تخيلوا المستقبل هيكون عامل إزاى عشان تقدروا تعرفوا هم محتاجين يتعلموا إيه 
المهم نقطة نظام و نقطة و من اول السطر 
و نبدأ فى التغيير …..
و ربنا يسترها على ولادنا و على منظومة التعليم
المنظومة الأولى بالإهتمام و المشاركة و التطوير 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: