بريد القراء أعداد: هويدا صابر
للأسف أحنا في سنة 2017 ولسه في البعض مننا لما يواجه أي مشكله في حياته خلاف زوجي أوتأخر زواج أوتأخر حمل أو شغل متعثر، يقولوا أحنا معمول لينا عمل ، ويبتدو يشكوا في كل ألي حواليهم ياترا مين أللي عمل العمل دا ، والأغرب أنك تلاقي ناس علي درجه كبيره من العلم وخريجين مدارس وجامعات أجنبيه وعايشين عيشه مرفهه جدا مش شرط تكون ناس بسيطه وعلي قد حالها ، تفكر التفكير دا وتقول معمولي عمل ، وأيه المطلوب عشان العمل يتفك وحياتي تكون جميله وطبيعيه ، في وصفه سحريه هاتوا عرق الحلاوه من عند العطار وأمسحوا الشقه كلها مرتين في اليوم وحطوا كف مريم علي باب الشقه ، ولا أقولك روحي لفلان أو فلانه سرهم باتع وبيجيبوا من الأخر ، فنلاقي ناس بتمسح البيت بالميه أم ملح أو بالخل كل يوم ويرشوا ميه مقري عليها قران في البيت ، ويولعوا البخور في الشقه 24 ساعه ، ويمشوا بالحجبه ، وتلاقي الواحده من دول ماسكه ملزمه مليانه أدعيه وأيات قرأنيه عماله تقرا فيها كل يوم ماهي وصفة الشيخ فلان ، أللي لو قولتلها في العادي أقري الجرنال هتضايق معتقدين أن دا ألي هيفك العمل للأسف السحر والشعوذه بقوا الشماعه أللي بنعلق عليها كل مشاكلنا.
دي مشكلة السائلة ز م:
أنا أنسه عندي 24 سنه وليه أختين بنتين غيري 22 سنة و266 سنة ، وطبعا كل البنات أللي حوالينا وقرايبنا أغلبهم أتجوزوا من مده وعندهم عيال ، وفي جاره لينا بتأكد أن احنا معمول لينا عمل عشان متعلمين وجمال ومفيش فينا عيب وكل ميجي عريس لواحده فينا يخرج ميرجعش وعرسان كتير جدا ، لما أحنا خلاص زهقنا ، جارتنا دي شارت علي أمي أن في واحده ست بتعرف في كل حاجه وبتعمل حجبه وبتفك الأعمال ، وعرضت علي أمي انها تجيبهالنا البيت تبص عليه وتشوفنا ، أمي وافقت والست جات في يوم بعد الضهر ولفت في البيت كله وأوضنا اللي بنام فيها أنا وأخواتي وقالتلنا معمول لينا عمل أترش في الأوضه وعلي عتبة البيت وأللي عملاه واحده مقربه لينا وبتدخل البيت وبتكرهنا ، وأدتنا وصفه نمشي عليها أزاره كبيره فيها ميه لونها معكر نضيف منها شويه في شفشق مليان ميه وبعد الحما نصب علي الجسم كله ، وأزاره تانيه نحط منها عي مية المسيح ونمسح مرتين في الأسبوع أتنين وخميس ، وكل شئ هيكون بخير بعد 40 يوم ، أحنا بقي كل تفكيرنا وقتها مين أللي عملت العمل في أتنين من زوجات أعمامي مش بيحبوا أمي ، وحصلت مشاكل لأن أمي أتهمتهم وبابا أتخانق مع أخواته وكانت حرب وجدتي أتدخلت عشان تهدي وتصلح بينهم ومافيش فايده ، وجيبنا شيخ تاني يقرا في البيت ويشوفه قال نفس كلام الست ومشينا علي وصفه ليه وهكذا وطبعا مفيش أي جديد في حياتنا غير أننا خسرنا نص أهلنا من ناحية الأب ، وأنا أخواتي البنات مش عارفين نعمل بصراحه ونصلح ازاي ونرجع الأمور لطبيعتها.
السائلة الكريمة:
أنتي بتقولي أنك أنتي وأخواتك البنات متعلمين ، متعلمين ومتعرفوش أن النصيب والأرزاق بأيد ربنا ، أنتوا لقيتوا بنات العيله والجيران أتجوزوا وأنتوا التلاته لسه فحصل عندكم نوع من أنواع الغيره أحنا جمال ومتعلمين أزاي العريس أللي يجي يمشي وميرجعش ، ماهو مشي عشان مفيش نصيب أو محصلش قبول وغيرها ، النصيب موجود وهيجي في وقته ليه القلق والأستعجال والتوتر ، ونلاقي أهل تتعامل مع بناتها عل أنها خلاص بايره وهتقعد جنبنا وتبدي تجرح فيها ، وأهل تجري ورا الدجالين وبناتنا معمول ليهم عمل ويتهموا أقرب الناس ليهم وتحصل خناقات ومشاكل زي محصل عندكم ، الموضوع دا أبسط من البساطه وياريت الأهل والبنات تفهم دا ، كل بنت رزقها معلوم وعند ربها وهيجي وقت ما ربنا يريد ويأذن ، مفيش رزق حد هيروح لغيره ، ولا الرش والحما بالميه الموصوفه هيجيب رزق من وجهة نظرنا أنه أتأخر ، سكة الدجالين والسحر بتخسر كتير وهتبعدكم عن ربنا وأهلكم ، أستعيني بالله وأتكلمي أنتي وأخواتك مع أمك وأبوكي بهدوء وعقل أنهم يتصالحوا مع أعمامكم ، ومن ناحيه تانيه أتواصلوا مع أعماكم عن طريق جدتكم وحاولوا تصلحوا بينهم ، وأموركم أن شاء الله هتتصلح كونوا بس واثقين في ربنا وفي نفسكم وأشغلوا نفسكم بأي شئ مفيد لحد ميجي لكل واحده فيكم أبن الحلال أللي يقدرها ويكون فيه الخير ليها ، وأسأل الله أن يصلح لكم الأحوال جميعا.
