الشاعر محمد زغلول يكتب
ضهره انحنى ..
والعُمر لسَّه ف أوِّله ..
شاف العجب !!
بس الحقيقة المحزِنة ..
في ناس كتير بتحملِّه ..
هو السبب !!
شايل شقا ..
ماسك في ذُل دنيته ..
بإيد ضعيفة ..
كالوطن !!
والناس عيونها مشنَقة ..
لا سابوه يكمل سِكِّته ..
ولا رحموا عُمره ..
اللي اتسجن !!
الواد وضهره ..
اللي انحنى ..
راسمين شموخهم ..
كالوتد !!
برغم قهرُه ..
اللي اتبنى ..
مِن بين شروخهم ..
اتوجد !!
راجل جدع ..
شال حِمل بيته ..
وأسرته !!
شال اللي غيره تحته ..
نَخ !!
ومن البِدع ..
بدل ما نرسم ضحكته ..
نرميه في وسط ألف ..
فَخ !!
والواد نجا من ظلمنا ..
فعلا نجا .. وبأعجوبة !!
واقف يواجه عجزنا ..
وبدرع شكل الأنبوبة !!
يا بلدنا :
لو كنتِ هتبني ..
يبقى البطل ده ..
أجمد طوبة !!
