بقلم : داليا طه
تكلم اى حد اليومين دول يقولك ياعايز يجيب حاجه بالقسط ، ياما ماعندكش جمعيه ، وماتقعدتش قاعده غير مايتذكر حاجه من الاختين الحلوين قسط وجمعيه ، تروح تيجى تسافر تقعد تطلع تنزل هما دولا اللى مابقاش نفكر غير فيهم ، الموضوع ببساطه القرش اللى مغلب صحبه ، تسافر وتتغرب علشان تأمن نفسك وولادك ، طاحونه مايلفهاش غيرك ، تتخرج واول ماتشتغل قسط وجمعيه تخطب وتجوز قسط وجمعيه وتدور على فرصه سفر لجمعيه اكبر وقسط لرفاهيات اكتر ، ويبدا مافيش غير شقه كبيره عربيه كبيره كماليات اكبر عفش اكبر ، وتخلص من دول تلاقي جمعيه لدفع مقدمه شقه لابنك وبعديها ااقساط للشقه وبعديها جمعيه لشبكه ابنى وبعد كده قسط لاجهزه ابنى والفرش ، وبعد كده يوم اما تنزل المفروض انك بتشتغل ليك ولاهلك واهل مراتك ياعنى هدايا لدول ودول ياتلاقي مستغربين راجع من غير حاجه وانتى بتقبض يابالدولار ياالدينار يالريال ، ولازم طبعا الفشخره والمنظره لاحسن يتقال عنك يااما بخيل يااما مكنز ورصاصهم ، وتلاقي نفسك انت في الطاحونه لوحدك من غير احساس جلد على طول من غير ماتاخد نفسك وتحس بمتعه اجتهادك وشقاك سنين حياتك واما تحب ترجع وتستقر تلاقي الابتسامه اتلاشت واللى بيجري عليك خلاص بردت معاه مشاعر استقبالنا ولو افتكرك بزياره او اتصال انتهى .
لانه مش شايفك غير زكيبه فلوس وقسط وجمعيه وتقعد وسط الحاجات اللى انت جبتها بالقسط او بالجمعيه وحيد .
اما لو مااتغربتش يمكن تلاقي مشاعر من اللى حواليك عاديه مش زائفه ياعنى اللى حيزورك حيزورك واللى بيتصل او مايتصلش زى ماهو ، بردوا عايش على الاقساط والجمعيه من بيت لعربيه لنادى لمدرسه لرفاهيات كله كله بالقسط والجمعيه وتخلص ليك تدخل على اولادك جمعيه لمقدم شقه وقسط شقه وقسط اجاهه وقسط شبكه وعفش.
زى مابؤلك كده انتى بقي فين شبابك فين نفسك فين متعتك ، لوفكرت تستمتع بحياتك وقلت عملت ايه حتلاقي نفسك عامل قسط وجمعيه في 365 يوم ومتعتك ماعملتهاش وهو انك تعيش لحظه بلحظتها وسيب مستقبلك بيدى الله .
رئيس قسم هو وهي : داليا طه
