مقدمة من / مروة كمال
وقت التحضير / 30 دقيقة
وقت التمليح / اسبوع او اكثر
المقادير :
عرق تريبيانكو وزن كيلو تقريبا
100:200 جرام ملح لكل كيلو لحم
خلطة التغليف :
حبه فلفل رومي أحمر
١٥٠ جرام توم يعني حوالي ٣٠ فص توم كبير
كوب حلبه مطحونه
كوب بابريكا بودره
٣ معالق كبار كمون
معلقه كبيره كسبره ناشفه
معلقه كبيره شطه
نصف معلقه كبيره بهار لحمه
معلقه صغيره فلفل اسود
معلقه صغيره ملح
لو تحبوا تضيفوا لون احمر غذائي
وشويه ميه علي حسب ما تحتاج
الطريقة :
– هنجيب عرق تريبيانكو ونشيل كل الدهون اللي حواليه خاااالص
– هنوزن العرق وكل كيلو هنحتاج ليه ١٠٠ جرام الي ٢٠٠ جرام ملح خشن علي حسب درجه الملوحه اللي بتحبيها
– العرق اللي استخدمته كان صغير وزنه كيلو و ١٠٠ جرام بس شيلت الدهون منه خااالص وعملت فيه فتحات بالسكينه
– في طرف العرق عملت فتحه دخلت منها دوباره وربطتها عشان دي اللي هيتعلق منها
– هننشف العرق من الميه خالص ونغلف العرق بالملح كويس من كل الجهات وندخل منه في الفتحات ونعلق العرق في اي درج من ادراج المطبخ بس نحط تحته طبق ونسيبه ليله كامله متعلق كده لحد ما ينزل كل الدم والسوايل اللي فيه
طبعا الملح هيحافظ عليه ونحاول يكون المكان اللي متعلق فيه في هواء مش مكتوم
– تاني يوم هنحط العرق في مصفي وعليه حاجه تقيله اوي عشان تضغط عليه وينزل اي سوايل فيه ونسيبه في المصفي حوالي ١٢ ساعه كمان
– بعد كده بفوطه نضيفه نشيل اي بواقي للملح من علي اللحمه
– هنفرم الفلفل مع التوم في الكبه لحد ما تنعم ونضيف كل التوابل والحلبه المطحونه
– نضيف معلقتين او تلاته ميه لحد ما الخليط يبقي زي المعجون ويكون ناعم
هنبل ايدينا بالميه ونأخد من الخلطه دي ونغلف بيها اللحمه من كل الجهات وما ننساش نحط في الفتحه اللي معلقين منها الدوباره عاوزين نعزلها تماما عن الهواء( ونحاول نشيل معلقه من الخلطه علي جنب )
– نساوي الخلطه كويس ونسيبها متعلقه في درج المطبخ لمده أسبووووووع علي الاقل
– ما تخافوش مش هتبوظ لأن الحلبه هتحفظها كويس
– تاني يوم لو حسيتوا ان الخلطه شققت استخدموا معلقه الخلطه اللي شايلينها علي جنب عشان نملي الشقوق دي
– وبعد أسبوع بقي قطعوها
– الكميه دي طلعت كيلو الا ربع بسطرمه صافي
و الف هنا على قلوبكم يارب
مدير مطبخ سحر الحياة / نيفين منصور
