بقلم دكتورة زينب زكى
لازم نعلم اولادنا كل صفة جميلة بشر اننا احنا كمان نكون بنتحلى بيها علشان ولادنا يثقوا فينا ويسمعوا كلامنا وميعملوش اى غلط لا من ورانا ولا قدامنا
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام
كان فيه زمان زمان ولد جميل واسمه جميل وكمان كان فيه بابا محمود يا ترى ايه اللى حصل ؟ تعالو نشوف …
جميل كان شاطر وجميل بيحب بابا جدا وبيسمع كلامه ومش بيعمل اى غلط لا من وراه ولا قدامه
وفى يوم من الا يام رن جرس الباب .. جرى جميل وفتح الباب لقى عمو حسين صديق بابا رحب بيه ودخله وقاله حالا انادى بابا
وفجأة اتسمر جميل فى مكانه وقعد يبص ويبحلق فى عمو حسين وهو قاعد قدامه .. عمو حسين استغرب وقاله
مالك يا جميل بتبصلى كتير كدا ليه؟
قاله مستغرب يا عمو .. هو فين وشك التانى ؟
عمو حسين استغرب هو كمان وسأله مين قال انى عندى وش تانى ؟
قاله انا بحب بابا وبثق فى كلامه وكل ما يتكلم عنك يقول انك بوشين وانا مش شايف غير وش واحد
وهنا دخل بابا ورحب جدا بعمو حسين اللى عاتبه قاله كدا يا محمود بتتكلم عنى من ورايا ؟ وكمان بتقول انى بوشين
انت متعرفش ان الغيبة والنميمة حرام ومينفعش تقول عنى شىء وكمان قدام ابنك .. طيب ازاى هو يثق فيك تانى وانت بتكلمنى كويس قدامى ومن ورايا بتتكلم عنى وحش وبتقول انى بوشين
انا صحيح زعلت منك لكن خلينى اقول للولد الجميل جميل ان بابا كان بيهزر معاك لما قالك عمو حسين بوشين
ولازم تفضل تثق فى كلامه وتصدقه فى كل شىء
وتوتة توتة خلصت الحدوتة حلوة ولا
تحياتى للجميع
ماما زوزو
