كتبت/ شاهيناز عبد اللطيف
جبر الخواطر
جبر الخواطر علي الله ..
ياما سمعنا الجمله دي ..طب انتوا فهمتوها ازاي ..؟؟
في ناس فهماها ان ربنا اللي بيجبر الخاطر ..دوول صح
وفي ناس فهماها ..انك لما بتجبري خاطر حد لايمكن هاتقدري تعرفي اد ايه ثوابك لأن ربنا هو اللي هيكافئك..ودوول برده صح ..وانا من الناس دي
طيب . يبقي كسر الخواطر علي مين ..برده علي الله ..يعني لما تكسر او تكسري بخاطر حد ..استني بأه جزائك من اللي خلقك
لما تقصدي وتمنعي جوزك عن بر أمه وابوه ولا اهله عامة ..ده كسر خاطر
لما تتعمدي تتباهي بعيالك او صحتك او جمالك ادام اللي اقل منك فالنعم دي ..ده كسر خاطر
لما تعرف ستات عالنت وتتواصل معاهم وانت متجوز ومراتك مافيهاش عيب او حتي فيها بس مخلصالك وحفظاك فوجودك وغيبتك ..ده كسر خاطر
لما صوتك يعلي علي امك ولا ابوك اللي شربوا المر علشانك ..وانا باقول بس يعلي ..ده كسر خاطر
لما ماتراعيش ظرف استثنائي عند جارك وتعمل مش شايف او تتجاهل…ده كسر خاطر
لما توجع صديق او صديقة بكلمة او تلميحة من باب الهزار او الاستظراف او التهريج…ده كسر خاطر
خليك او خليكي ..تجبري ماتكسريش
علشان زي ماجبر الخواطر علي الله …كسر الخواطر برده علي الله
