بريد القراء أعداد: هويدا صابر
أنك تمد أيدك وتاخد حاجة غيرك وتحللها لنفسك أكتر من مره يبقي أنت أنسان طماع وحرامي ، ومستكتر عليه نعمة ربنا وعينك في أللي فأيده ، وأبسط شئ هيعمله معاك هو أنه هيقاطعك أو هيخبي كل شئ قبل متدخل عنده ، وبكل الطرق هيوصلك رسالة أنه فهمك.
مشكلة السائلة الكريمة ح س:
والدتي ليها صديقه مقربه ليها جدا أخلاقها عاليه ومحترمه وزوجها منفصل عنها من سنين وعندها بنت وشاب ومتربين كلنا سوا ، بنت صديقة ماما مفيش مره تيجي فيها البيت غير لما ألاقي حاجه من أوضتي أختفت من المكياج أو الأكسسوار أو الطرح واللبس ، لدرجة أنها كانت بايته عندي مره سرقت فلوس من محفظتي ودي مش أول مره ألاقي فيها فلوس ناقصه ، وعشان أتأكد خليتها في الحمام وفتحت شنطتها لقيت الفلوس ، عملت أن في تليفون جالي وأن خالتي عاوزاني ضروري ولبست ونزلتها معايه ، وأخر حاجه دخلت عليها فجأه لقيتها ماسكه موبايلي وبتحاول تقفله قولتلها في حاجه قالتلي لا أبدا بشوف الساعه كام عشان أظبط ساعة موبايلي ، وأللي ضايقني أكتر أن صحباتي كانوا موجودين وهي موجوده كل واحده أختفي من شنطتها حاجه ، المشكله أنها بتيجي البيت كتير مع والدتها أو لوحدها وأنا مش عارفه أتصرف معاها أزاي هي طبعها فيه الطمع من زمان لكن أنها توصل للسرقه دا أللي صدمني ، وطبعا أنا مش قادره أتكلم عامله حساب لوالدتها صديقة والدتي وأللي زي أمي ، أعمل ايه؟
—————–
السائلة الكريمة: في البدايه لازم تقولي لوالدتك علي تصرفات البنت ، وبعد ما ومتعرف ممكن تواجهي البنت نفسها وتنصحيها بينك وبينها خوف عليها وعشان مصلحتها وتعرفيها أن محدش هيعرف حاجه عن سرقتها وتعرفيها أن تصرفها دا ممكن يخسرها كتير ويسبب مشاكل ليها ولسمعتها وقوليلها أن صحباتك عرفوا أنها هي أللي سرقتهم وكانوا عايزين يقولوا لمامتك ، ودا كنوع من انواع التخويف ليها ودا الحل الأفضل من وجهة نظري يمكن تتغير ، لو معندكيش القدره علي مواجهتها ومحرجه وعامله حساب للعشره ولصديقة والدتك ، بردوا والدتك تعرف وتقوليلها يا ماما أنا هقطع علاقتي بيها لكن علاقتك بوالدتها خليها مستمره ، ولما البنت تجيلك أنزلي زي مانزلتي قبل كده ، ومره وفي مره علاقتك هتتقطع بيها بالتدريج ، وفي وجودها لاتدخل أوضتك ولا تسبيها لوحدها في مكان وهي وقتها لازم هتفهم أنك عرفتي ، وربنا يهديها ويصلح أحوالها.
