أغذية التركيز
……………..
شيف شطوره : سالي سليمان
ابني ما بيركزش ….. اعمل ايه
اقعد مع بنتي اشرح الدرس ساعتين و لما اسألها فهمتي ايه الاقيها مش عارفة حاجة ….. أنا هتجنن
كل المدرسات بيشتكوا ان ابني بيسرح …. ايه الحل
شيف شطورة بحثت و دورت و جابت لك الحل
تقدري تزودي تركيز ابنك او بنتك بالغذاء السليم … شوية اصناف أكل بسيطة و مش مكلفة لكن هتفرق كتير في تنشيط الذاكرة و التركيز عند الأطفال
البيض:
عندك بيض مسلوق، مقلي، أومليت، عجة ،،،، بيض بأي شكل يحبه ابنك و معاه عيش بالردة و القمح الكامل و فطري او عشي ابنك بيهم 3 مرات اسبوعيا و اتفرجي على النباهة
زبادي كامل الدسم:
ايوة زبادي مش حليب و لا رايب(مش تقليلا من برستيجهم طبعا) بس هو الزبادي لو هدفك التركيز
و يا سلام بأه لو عليه معلقة عسل نحل ، قطعة فاكهة فريش، حبوب الافطار بالقمح الكامل (كورن فليكس يعني) بردو للفطار ، أو كصنف حلو بعد الغدا بساعتين على الأقل 4 مرات اسبوعيا و اوعى وشك ، لمبة المخ هتنور
الخضروات الورقية ذات اللون الأخضر الغامق: اشهرهم طبعا السبانخ، و مش لازم تكون مطبوخة و مسبكة و الحركات دي، ممكن جدا نعملها بلانشينج ؛ و هو مصطلح اجنبي معناه ندي السبانخ حمام سخن في مية مغلية لمدة 5 دقايق، بعدها نصفيها و نصدمها صدمة العمر في طبق فيه مية متلجة…
نعمل ايه بأه بالسبانخ المصدومة دي !
نحطها في لازانيا، أو صوص الكريمة مع مكرونة قواقع، أو نعمل قرص اومليت دمه خفيف و نحطها فيها و نلف الاومليت زي الكريب(اتنين في واحد كده) أو في عجة… الكلام ده لو حصل 3 مرات اسبوعيا ابنك هيكون باباي عصره و اوانه في المذاكرة..
السمك:
أسهل حاجة افتحي علبة تونة مرة في الاسبوع و لاعبيها كل الألعاب : سلطة تونة بالخضار و المايونيز و الزيتون، مكرونة بالتونة، جلاش بالتونة و الجبنة، و كور كفتة التونة المقلية
المكسرات:
عين جمل، لوز، فول سوداني، حبوب دوار الشمس، كاجو، مكاديميا… أي حاجة من دول شغالة معانا
عارفة لو ابنك ما بيحبش الحاجات دي تعملي ايه ؟ فاكرة الزبادي ابو عسل و فاكهة ؟ افرمي المكسرات ناعم خالص في الكبة و حطيله كل يوم معلقة منها على الزبادي و لا من شاف و لا من دري
التفاح:
أي نوع ، لو ابنك اكل تفاحة يوميا بأي شكل؛ مرة زي ما هي كده و يقرقض فيها،مرة مبشورة، مرة مسلوقة مع مية و عسل نحل و معمولة كومبوت، أو طبعا وصفة شطورة جونيور شيف بالكرامل ، كل ده جميل، بس نصيحة بلاش نكتر من السكريات دي مش هنصلح دماغه و نبوظ وزنه(مش نظبط الجاكيتة يقوم البنطلون يضرب)
الشوفان
له أفكار و وصفات كتير حلوة و حادقة، احشريه في اكل ابنك ان شالله في كل الوجبات كل يوم
و ان شاء الله ربنا يهديهم جميعا و يركزوا في مذاكرتهم و دروسهم و ينجحوا في امتحاناتهم بتفوق قادر يا كريم
مدير قسم هو وهى : داليا طه
