حاورتها هاجر عباس
سارة بدر ( باربي المصرية ) الفتاة التي تجاوزت العشرين من عمرها وأثارت ضجة على مواقع السوشيال ميديا لظهورها مثل أميرات ديزني … بسبب جنونها بهم وهو ماجعلها أصبحت وكأنها أميرة مثلهم ولايمكنك التفرقة بينهم
كيف كانت بدايتك في عالم الرسم . وكيف ومتى اكتشفتي موهبتك؟
– بدأت بتعلم الرسم بمساعدة والدتي في سن ٤ سنين و كانت بتدعمني وتشتري لي دفاتر الرسم والتلوين وكنت بخلص الدفاتر في نفس اليوم لحد مابدأت اتقن الرسم وبالتحديد شخصيات ديزني وبعدها اتقنت الرسم بالزيت وبعدها الفحم و دا اللي ساعدني علي الرسم بالميك أب فيما بعد .
كيف استطعتي رسم استايل لنفسك وميك أب خاص بيكي؟
-كنت عايشة خارج مصر وكان عندنا بيوتي سنتر و كنت دايما اقف جنب الميك أب ارتيست واتعلم منها و اتعلمت من فيديوهات اليوتيوب لمدة سنتين و بدأت اجمع من هنا ومن هنا واطبق علي نفسي مرة واتنين وعشرة لحد مابقى ليا إستايل خاص بي .
كيف ربطتي حبك الميك أب بتقمص شخصيات ديزني؟
من وانا صغيرة كنت متعلقة بشخصيات ديزني و من حوالي ٤ سنين حضرت حفلة هالوين و كنت عاملة لنفسي شخصية ملاك و بالصدفة حضر فريق عمل بيعمل عرض للحفلة واكتشفوا اني عاملة الشخصية لنفسي بإحترافية و شجعوني اكمل في المجال دا … ومن هنا دخلت مع نفسي في تحدي اني اقلد الشخصيات بالملابس كمان .
ملابس الشخصيات كانت مذهلة ومصنوعة بطريقة احترافية كيف تم ذلك؟
-اللبس كان أكثر حاجة متعبة بالنسبة لي واشتغلت مع ناس كتير لحد مااستقريت مع مصممة أزياء بتنفذلي اللي بطلبه بالظبط لأني حبيت أعمل اللبس بطريقة قريبة من لبس الشخصية ولكن باللي يناسب سارة .
إقرأ المزيد نهاد نور أحمد حلمي نجمي المفضل وقدوتي أعادني للدراما قيد عائلي ووالدتي مديرة أعمالي
عندما دخلتي التحدي ونجحتي فيه هل وجدتي نفسك اكتر في هذا المجال ولا في مهنة الميك أب ارتيست ؟
-الاتنين بالنسبة لي بحبهم لكن قدرت اعمل ميكس بينهم واطبق الاستايل بتاعي وموهبتي في المهنة عشان اعمل شغل واستايل خاص بيا .
كيف استطعتي أن تقنعي خطيبك كرجل شرقي أن يشاركك بصور للشخصيات الكارتونية ؟
-هو من محبي الشخصيات دي جداً وأنا شجعته إنه يطلع حبه ليها ونفذنا الفكرة .
هل كان الأهل دور في تشجيعك أم قمتي بالاعتماد على نفسك وموهبتك؟
-أهلي من البداية وهما بيدعموني جداً وبالرغم من إني شخصية عنادية إلا إنهم قدروا يوصلولي أراءهم دايماً بطريقة
تحبي تنصحي البنات اللي مش قادرين يكتشفوا شغفهم بإيه ؟
-كل واحد في الدنيا عنده شغف وموهبة ولازم يجربوا كذا حاجة لحد مايقدروا يحددوا هما موهبتهم فين بالظبط .. يعني أنا لحد دلوقتي لسه بكتشف في نفسي مواهب جديدة في كذا مجال مختلف .
كيف تتعاملي مع النقد سواء كان إيجابي أو سلبي؟
-النقد الإيجابي هوا أكتر حاجة بحبها وبستفاد منه جداً .. أما النقد السلبي اللي بيكون مفيش منه أي نفع يخليني اطور من نفسي فبتجاهله تماماً وبكون متفهمة الشخص اللي بينتقد بطريقة سلبية .
بما إن السوشيال ميديا أكثر طريقة ساعدتك في عرض شغلك و موهبتك بماذا.. تنصحين غيرك في التعامل معها؟
-السوشيال ميديا فعلا سهلت عليا كتير لكن الفكرة إن الواحد لازم يعرض شغله بطريقة ذكية وبرا الصندوق لأن أهم حاجة الفكرة تكون جديدة ومختلفة عشان شغله يوصل للناس و ربنا يوفق الجميع …
إقرأ أيضا منال سلامة أنا وزوجي قصة حب وكفاح طويلة والعمل الفني يعتبر أمن قومي
