محمود شحاته
..
وكلامك ..
بيشد لحاف الدفا من جوف البرد
وينام حاضن شوالين الامنيات
ف يبات الخوف تحت القناديل عمران بالنور
ويبات الليل مستور
وكلامك قال ..
كل اللى سهرت عشانه سنين
قصاقيص الليل و رموشك
والمطر الطفشان م السما يتوارى
فى اوجاع الطين
عارفه ..
شبابيك الروح خربانة وملانة شقوق
وكتير كانت امانينا.ابسطها حقوق !
فبلاش عتبك يجرحني
وبلاش قبل الفرح مايجمع بين احلامنا
دمعك يقسمني ويطرحني
والله ماكنت ناسيكي
وبسأل ..
ولساة قلبي لما يشوفك يشكي ويحبي
ويطير اسهل
ولسا صباحك وانهار العمر فى تجاعيدك
تزرع جوا ضلوعي الخير
عطشانة كفوفي تلاقي امان
عطشان البحر يلاغي الطير
عارفة
ويا كلامك ايام الشقا بتهون
وعضامي تفتح زي الورد وتقوم هامة
الضم حب فى روح بتعافر
الضم شعر بفتحة و شدة و ضمة
هو صحيح ليه بطمن لما انام
على اخر كلمة
فى اخر همسة
فى اخر سطر
زي محطة بينعس ليلها فى حضن القطر
زي ما اكون محلول المر
الدايب جوا جفون الصبر
عارفة ..
كلامك هو السند الفاضل لي ،والايام بتعقرب
كل ما شرق ، ابعد ، امشي ،
تجري ايامي مني وتهرب
انا من غيرك يا اماه متاهة
انا من غيرك حلم يراود صاحبه ويكذب .
..
إقرأ أيضا
مدير قسم الأدب و الشعر
علا السنجري
