كنت باروح المدرسة وأنا راكبة الحنطور
أمي وأبي واخواتي هم من شجوعوني ولهم الفضل في نجاحي
احببت نجوي إبراهيم جداً ، وانبهرت بشخصية حمدي قنديل وادائه
الشيخ صالح كامل قاللي كملي فبرنامجك زي ماانتي بالحجاب
عرفت اد ايه مهنة التمثيل شاقة
الحجاب مش مجرد طرحة أنا باعتبره جهاد عظيم
حوار شاهيناز عبد اللطيف
هي مذيعة وإعلامية من طراز خاص جداً ، إستطاعت ان تحقق المعادلة الصعبة والتي تعجز عن تحقيقها كثيرات ممن يمتهنون نفس المهنة ، فقد جمعت بين اللباقة وجمال الصورة والمظهر المحترم المتماشي مع طبيعة مجتمعنا العربي والشرقي فضلا عن خفة الظل والروح والتي جعلتها تخترق قلوب المشاهدين قبل آذانهم ، انتهجت نهج مميز بها فأصبح من السهل ان تعرفها من بين المئات وفي نفس الوقت اصبحت مدرسة بذاتها لكل مبتدئة تريد ان تحفر لها اسم او شخصية في عقل وقلب المشاهد ،انها اول مذيعة تقريبا ترتدي الحجاب في وطننا العربي ، انها الجميلة الدمثة حسنة الخلق والخلقة دعاء فاروق.
سوف ابدأ معكي منذ الطفولة كل فتاة كانت تحب ان تلعب مع اصدقائها او اخواتها وتختار ان يكون لها دور، منهم من كانت تحب ان تكون مدرسة اوطبيبة أو رسامة مثلاً
فأي شخصية كانت تفضل دعاء فاروق ؟
لما بتقابل مع صحابي دلوقتي بيفكروني بحاجة ، إن وأنا صغيرة كنت باجيب الجرنال واقعدهم اودامي واقعد اقرالهم زي مذيعين الأخبار
هل دخولك إلي عالم الميديا كان صدفة بحتة ام فرضته عليكي طبيعة دراستك في كلية الأداب قسم اللغة الإنجليزية ؟
دخولي مجال الإعلام كان صدفة ولا فرصة ولا فرضته عليه دراستي ،دخولي كان برغبتي بعد مااشتغلت فاكتر من مجال الأول مضيفة ارضي وبعدين في شركة مالتي ناشونال فالمبيعات وكان العامل المشترك بين الشغلانات دي هو لباقتي مع الجمهور بس حسيت اني مش لاقيه نفسي فيهم ، فارحت وقدمت فالart وقتها ماكانوش عاوزين مذيعات بس قالولي سيبي الcv بتاعتك وبالفعل جهزتها في يوم ورحت اقدمها وكان صدفة يومها انهم بيعملوا اختبارات للمذعات واختبرت ونجحت.
من شجعك اكثر البيت ام اصدقائك ؟
أكتر ناس شجعوني طبعاً أمي وأبويا وأخواتي ، صحابي فرحوا بيا بعد شهرتي في الأول ماكانوش حاسين بيه اوي ، انما الأساس كان البيت.
بداياتك كانت ببرامج المنوعات في قنوات الart هل اراتدائك للحجاب الزمك بالإتجاه للبرامج الدينية ام ليس له علاقة؟
أول ماارتديت الحجاب الشيخ صالح كامل رائد الإعلام فالوطن العربي قاللي لا ماتتجهيش للبرامج الدينية خصوصا ان ده اللي كان سائد وقتها وقاللي بالنص أنا مش عامل قنوات للي لابسين حجاب وقنوات للي خالعين الحجاب معنديش قنوات للسفور وقنوات للحجاب ، انتي شكلك طبيعي زي أي أخت او أم او زوجة موجودة فالشارع المصري وكنت أول مذيعة بالفعل تقدم برامج منوعات بالحجاب، لكن انا اللي فضلت بعد كده اتجه لبرامج اجتماعية او دينية لاحساسي انها بتخدم وممكن اقدم رسالة حقيقية من خلالها للمجتمع.
كيف تأثرتي بنشأتك في مدينة طنطا وهل سر شخصيتك والتي تمتاز بالصراحة والوضوح والسلاسةهي التي ساعدتك علي الوصول للمشاهد وكأنك فرد من افراد الأسرة ؟
الحقيقة انا لسه متأثرة بنشأتي في بلد زي طنطا ومش باعدي اي فرصة الا مااقول كده ، طنطا بلد باحبها جدا وده كتبته في كتاب عن حياتي وانا صغيرة وازاي كنا بنروح المدرسة وانا راكبة الحنطور ونسمع احلي صوت مخترة حصان ونشم الهوا والشمس تيجي مباشرة عليكي حتي لما كبرنا شوية عمرنا ماتكربسنا فاتوبيس مثلا كنا بنروح اي مكان مشي، الكلام ده مش متاح في القاهرة بزحمتها في ناس كتير محرومين من الروقان والهدوء اللي عشناه واستمتعنا بيه في بلد زي طنطا.
بعد ان دخلتي عالم الصحافة ومنه إلي التليفزيون والفضائيات علي من كانت عينك واعتبرتيها مثل ليكي وتمنيتي ان تكوني في شهرتها في يوم من الأيام؟
كنت باحب كل مذيعات التليفزيون المصري وكنت باحب جدا واتأثرت بنجوي إبراهيم،اتأثرت بشخصيتها البسيطة وهي علي طبيعتها وسط الناس بتضحك وبتتكلم ، لكن في كمان استاذ حمدي قنديل اتأثرت بشخصيته المميزة وبجرأته وبتفرده وبكلامه وادائه وثقته بنفسه ، انا فكرة التفرد عامة بتعجبني وتشدني جداً.
منذ فترة قومتي بتقديم برنامج ناجح واستطاع ان يوجد له مكان بين البرامج نظرا ً لإختلاف طبيعته عن برامج التوك شو العادية وهو برنامج حياتنا ، هل عملك في هذه النوعية من البرامج اكثر متعة من برامج الضيف الواحد ام مرهقة ؟
برنامج زي حياتنا باعتبره متعة ما بعدها متعة لأنه اداني فرصة اتعرف علي مصر بلدنا من اول وجديد وادخل حواريها وشوارعها هو طبعا مش بيظهر الجانب السلبي او المتعب نفسيا فيها بس انا حابة اني اشوف مصر الحلوة من خلاله ، طبعا هو كبرنامج مرهق جسديا غير برامج الضيف الواحد ، سهلة بتروحي استوديو تقعدي مع ضيف موضوع مافيهوش تحدي كبير ولا جهد واعداده مش كبير ،الناس اللي بتطلب وتتبرع بقصص ممكن تكون عادية وممكن يجيلك ذهول منها فالاول والاخر البرنامج بيسوق نفسه عكس برنامج زي حياتنا.
تقابلتي خلال برنامجك الشهير الدين والحياة بكبار الشيوخ والعلماء ونخبة من افضل الأطباء علي مستوي العالم العربي ،اكيد اضافوا لدعاء الكثير ،لكن يبقي منهم من ترك علامة واثر في نفسك ياتري مين ؟
الحمدلله كل الشيوخ اللي اتقابلت معاهم علامات بارزة في الخطاب الديني فمصر وفي منهم اللي بدا معايا فالبرنامج واصبح اسم لامع وعلامة زي الشيخ رمضان عبد المعز اللي كان لسه راجع من امريكا وبدا معايا فالدين والحياة واتعرف من خلال البرنامج والبرنامج عمل اسم من خلاله
والشيخ خالد الجندي اعتز جدا اني استضفته ، عالم وجهبز وبحر من العلم لاينضب
الشيخ اشرف الفيل راجل باحترمه جدا وباحترم اراؤه وان كنت باختلف احيانا معاه في بعض تلك الاراء الا انه بيمتاز برحابة الصدر جدا.
الشيخ احمد ترك شيخ عقلاني اوي
هل في وقت من الأوقات شعرتي بتعارض او تصارع مابين حياتك الشخصية والمهنية والمعروف انك متزوجة من رجل الأعمال عماد مختار وزواجكم اثمر عن 3 من الابناء ..هل في فترة ما شعرتي بصعوبة التوفيق بين التزاماتك كزوجة وام وبين شغلك وكونك شخصية عامة ؟
بصي الحمدلله التوفيق بين شغلي وخروجي للعمل او كزوجة قدرت اعمله بفضل الله وانا شايفة اني لو كنت باشتغل في بنك مثلا كنت هاسيب البيت اكتر من لو مذيعة دي ناس بتنزل من 7 صباحا ل7 مساءا .انما عندنا لا ، طبعا الدنيا اتظبطت معايا بمساعدة امي وناس حواليه محترمين وثقت فيهم.
نشاهد الكثير من المذيعات اتجهوا للتمثيل او الظهور بصفتهم الاعلامية فمسلسلات ؛ هل عرض عليكي شئ من هذا القبيل وخصوصا انك تمتلكي وجه له قبول جماهيري او الكاميرا بتحبه بلغتكم ؟
لا الله يكون في عون اللي بيمثلوا ، انا بالنسبالي فكرة التمثيل شئ صعب واتأكدت من صعوبته لما نزلت تصوير لبرنامج زي حياتنا لأن احيانا بنصور زي تصوير المسلسلات والافلام ونعيد فاللقطة اكتر من مرة ، عرفت اد ايه شي مرهق ومتعب، وانها مهنة ليها ناسها اللي بيتعبوا جدا فعلا عشان ينجحوا، لا انا مش اد المهنة دي
ما هو رأيك في موضة خلع الحجاب والتي انتشرت الفترة الأخيرة سواء بين مشهورين او فتيات عادية ؟
موضوع خلع الحجاب اصبح زي عدوي وبتنتشر بين البنات اوي ،يعني يشوفوا بعض قلعوا يقولوا يلا ماهو فلانة قلعته اشمعني انا،وبيقولوا ان الحجاب حته طرحة هو مش بس طرحه انا باعتبره جهاد عظيم ان الست تتخلي عن جانب من جمالها وشكلها واصرار البعض انه مش فرض فافي ستات بتضعف في حين انه بيحمي المرأة من تنازلات كتير لان بيبتدي بخلع الحجاب وبعده لبس عريان مثلا او مايوهات او تواجد فاماكن غير لائقة وانا شايفة ان الحاجة الحرام الصغيرة بتجر لحرام اكبر فامنستهونش ابدا بأي خطوة نعملها سواء حرام اوحلال لانها بتجر للي اكبر منها.
تربعك علي عرش افضل مذيعة لأكثر من عام علي التوالي لم يأت من فراغ اكيد ونتيجة مجهود واخلاص لله في العمل ما هي روشتة النجاح التي تكتبها دعاء فاروق لكل فتاة تحلم بحلم العمل كامذيعة ؟
والله موضوع تربعك علي العرش دي انا مش متاكدة منها ومش عارفة صح ولا غلط ، القمة تسع الجميع وفي كتير اوي ناجحين ومتميزين فبرامجهم وقنواتهم وكتير يعتبروا رقم واحد وانا الحمدلله اني قدرت اوجد لنفسي مكان وسطهم لان في قمم كبيرة، وبالنسبة لروشتي ، تكون بقدر الامكان علي طبيعتها مش متصنعة وتقرا كتير خصوصا فالمجال اللي بتتكلم عنه ،مش ضروري تكون عارفة كل شئ بس عالاقل ملمة بالموضوع اللي هتناقشه علي سبيل المثال لو فالدين تقرأ كتير وتتثقف قبل ماتقتحم اي قضية او موضوع .بس 
