شعر وحكاياتعام

يامعاشى يامزعلنى

بقلم هانى توفيق 
 يامعاشى يامزعلنى كل مسا وصباح 
 يامبدل نور أفراحى بكل آلام وجراح 
 نفسى أبات ليلة واحدة وقلبى مرتاح 
علشان أسكت حزنى اللفت بقى تفاح 
 يوم عشرة من كل شهر الجيب نواح 
 بقيت كل شهر عايش بالأوهام سواح 
خليتنى فى عز النهار شايل المصباح 
اللهم اجعله خير آل ايه انا عند جزار 
 قلتله هاتلى الموزة قاللى بلاش هزار 
 وروح يامتعوس ركب للجلابية زرار 
 أنت آخرك حتة جبنة وربع كيلو خيار 
 من العيد للعيد تفرح بنص كيلو ممبار 
خلاص يا معلم اسكت الجيوب أسرار 
 قلت لنفسى صبرا دا الليل آخرته نهار
 يامعاشى أنا عايز أعيش زى الناس 
 فين ميزان العدل والوزن بالقسطاس 
 ياما سمعنا بمنكوبى الدخل لا مساس 
 لحمة سمك فراخ خضار علينا امواس 
علاج أمراض مزمنة قلب وبنكرياس 
 وضغط عالى فى المخ بيضربنا بفاس 
أمراض بالألم دايمة والأسعار هراس 
حتى العدس اللى كان بيدفى السقعان 
 سعره اتهبل بقيت بردان من التوهان 
 آه لو كنت أملك لساعة خاتم سليمان 
لقلت للمارد أنا من كل مسئول زعلان
 أبوس إيديك هاتلى دوا لمعاش تعبان
 اشترى به دوا واكمل الشهر بادنجان 
والله أسعار الدوا كارثة بتعذب الغلبان 
 ياحكومة اتقى الله جاى يوم الحساب
 فواتير الميه والنور بقت علينا عذاب 
 الحرمان بقينا معاه حبايب وأصحاب 
 وناس بتستورد أكل قططهم والكلاب
 تانى هقول فين العدل يا أولى الألباب 
 ربنا كرم بنى آدم أنتم منه فى غياب 
 دعوة المظلوم للحق ليس لها حجاب

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: