عام

البصباص

بريد القراء أعداد: هويدا صابر

البصه المقصوده لغير شريك حياتك خيانه ليه ، الكلمه الناعمه أللي فيها أهتمام لغير شريك حياتك خيانه ليه ، هتقولي بلاش تهويل مش لدرجه دي هقولك ماهو الأنسان أللي دخلته في حياتك لو مكتفتش بيه عن العالم كله يبقي العلاقه دي متنفعش وفيها حاجه غلط وجرح للطرف التاني وأهانه لمشاعره وأستهانه بيه والخيانه بتبدأ ببصه النهارده وبكره تبقي …..؟ صح ولا غلط.


دي مشكلة السائلة س م:
أنا متجوزه بقالي عشر سنين وعندي 33 أطفال ولدين وبنت ، بصلي وبصوم وملتزمه ، مشكلتي أن جوزي مش مقصر في بيته كل طلبتنا مجابه لكن هو بصباص من يوم متجوزته وكنت فاكره أن دا أخره شويه لقيته أبتدي يبقي جرئ عن الأول عينه متزلش من علي أي واحده عجباه حتي لو كانت من قرايبي ، ودا بيسببلي أحراج شديد ، ومن 4 سنين بس لأني كنت مغفله أكتشفت أن الموضوع أكبر من كده بياخد ستات في شقته التانيه وبالأخص في واحده معاه بقالها 6سنين متجوزه وجوزها مريض وعشان أصدمك أكتر يا أستاذه دي جارتنا وبيقابلوا بعض علي طول ، دا غير أن في حد من قرايبي بثق فيه جدا شافه في الشارع واقف بعربيته وبيتقف مع واحده بعدها ركبت معاه ، فصوره بموبايله ووراني الصوره ودي مش أول مره أختي شافيته قبل كده معاه واحده في العربيه وأيده علي شعرها ، أللي صدمني أكتر أبنه شافه وهو بيتصرف تصرف مش كويس مع جارتنا أللي قولتلك عليها علي السلم الولد صوت علي السلم وأنا خرجت جري علي صوته كانت دخلت وقفلت الباب ، أنا بعدها سألته بهدوء قالي باباه كان بيعمل أيه مع جارتنا ، أما أبني الكبير أللي عنده 8 سنين بقي دخلت عليه الأوضه فجأه لقيته بيتصرف تصرف مش كويس مع نفسه لما زعقتله وهضربه أتخض وقالي أنا أسف مش هعمل كده تاني بس أنا شوفت بابا بيعمل كده في الصاله وكان بيكلم واحده بس هو مشفنيش ، هرد أقول أيه غير حسبي الله ونعم الوكيل ، أنا أتخانقت معاه ضربني وشتمني وقالي أنتي مش ست أصلا ودورك البيت والعيال تربيهم ، أنا مش عارفه أعمل أيه أطلق وأروح فين بيت أبوه بأولادي التلاته ولا أصبر وكل واحد فينا في ناحيه. 
السائله الكريمه:
 في ناس مبتسامحش في الخيانه ، وفي ناس بتسامح وبترجع عادي ، بس أللي سامحوا أيه الضامن ليهم أن أللي خانهم مش هيخونهم تاني ، خصوصا إذا كان الخاين زي زوجك متعود علي خيانتك من سنين السنين دا غير أنه بقي زي الفيروس بينتشر في البيت أبنك دا شافه ولا فرق معاه صدمة أبنه وأبنك التاني بيقلده ، لكن أنا لفت نظري أنه قالك لما أتخانقتي معاه أنتي مش ست أصلا وأنا مش مبرر خيانته بس هل أنتي كنتي مقصره معاه فوصل للدرجه دي ، وأنتي وصفك لنفسك أنا بصوم وبصلي وملتزمه ، ودا شئ جميل لكن أنتي بتهمتي بنفسك وبيتك وبيه هو شخصيا ، يعني لما بيرجع من شغله بتقعدي معاه وتسمعيه ويكون بينكم حورات وهو في شغله بتكلميه تتطمني عليه علي الأقل مرتين ولما بيرجع بيلاقي البيت منظم وريحته حلوه وأنتي لابسه هدوم مظبوطه عليكي ونحط ميت خط تحت مظبوطه عليكي لأن في ستات بتلبس لبس أكبر من مقاسها مرتين وهل ريحتك بتكون حلوه ، ولا بتستقبليه بلبس المطبخ أللي ريحته كلها أكل ، أرجوكي لازم تقعدي يومين مع نفسك تجاوبي علي كل الأسئله دي وأنا بعتلك تجربه عرضناها قبل كده بأسم لحظة غفله أنتي أتصدمتي من رد فعل الزوجه فيها وكان ردك عليه ياريتني مكنت واجهته ، نقطه ومن أول السطر أعتبري أن محصلش مواجهه بينك وبيه هتقدري تغيري من نفسك وتهتمي بيها وبمظهرك وتخسي وتحتويه واحده واحده وتشوفي هيتغير وهيبطل كل دا ولا لأ وأهو يكفي شرف المحاوله ، وفي نفس الوقت لازم تحوطي علي ولادك كويس جدا بعد أللي شافوه ، هل هتكوني قويه وتقدري تعيدي حساباتك وتكوني صريحه جدا مع نفسك ، هل هتتغيري وتصبري لحد متشوفي النتيجه في الأخر أللي هتكون أحتمال يتغير وأحتمال يكون أتعود علي كده خلاص ودا أولا ، ثانيا تعيشي معاه والسلام وتربي ولادك وكل واحد فيكم في حاله وممكن تتكلمي معاه أو حد من أهلك يتدخل عشان يسيبلكم البيت ويجي من فتره لتانيه يزور ولاده ، أو تطلقي وتفضلي في بيتك ويبعتلك مصاريفكم ، الأختيارات كتير وكل أختيار حسب مقدرتك ، وبالنسبه لرأي أنا الشخصي أللي أنتي كنتي مصره تعرفيه فكان الأنفصال لأن فات الأوان ، لكن أنتي سكتي ، ربنا يصلحلك الأحوال ويباركلك في ولادك ويحفظهم.

عرض مزيد من التفاعلات



مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: