حاورتها: مها نور
هي فنانة جميلة تتسم بالرقه والجمال والثقافة وعشقها للغة العربية والتعمق في قراءة القرآن ومعانيه، عندما تقترب منها تكتشف إنسانه بكل معني الكلمه اُنثي يملؤها الحب والجمال والعطاء تنثرعبيرها علي كل من يقترب منها بدون مقابل تحب فنها بجنون راضيه ومتصالحة مع نفسها في زمن قل فيه الرضي والتصالح مع النفس لا تجد في ملامحها غرور ولا تكبر عندما تتحدث إليها تشعر وكأنك تتحدث إلي نفسك حينها تشعر وكأن رئتاك امتلأت بنسمات الحب والصفاء والسعادة إنها الفنانة الجميلة “وفاء سالم “النمرة التي عشقها النمر الأسود اقتربت “مجلة سحر الحياة” منها لنجري معها حوار خاص من القلب وسألناها
، التمثيل بالنسبة لكِ هل كان هواية منذ الصغر ام جاء بالصدفة؟
،، انا حبيت التمثيل من وأنا طفلة كنت بتفرج علي كل الاعمال الفنية القديمة للفنانين العظام زي سعاد حسني، ناديه لطفي، فاتن حمامة وكنت وقتها بشوفهم كأنهم أميرات في عالم سحري كانو بالنسبة ليا حلم بعيد المنال وكنت بتمني اني اكون في يوم من الايام زيهم نجمة بمثل علي الشاشات.
، الحلم ده فضل حلم لغاية امتي وازاي اتحقق؟
،، وأنا في المرحلة الأبتدائية كنت بحب اللغة العربية وبحب اسمع فيروز يمكن لو كان صوتي حلو كنت دخلت مجال الغناء لأن الغناء بالنسبة ليا شئ مختلف بيخليني عايشه في عالم تاني من هنا بدأت احس اني لازم اخد خطوة جادة وفي المرحلة الثانوية وهي اني ادرس عشان اوصل لحلمي وفعلأ قررت أني اسافر إلي مصر عاصمة الفن والفنون والتحقت بالمعهد العالي للسينما وقتها قابلت المخرج العظيم “عاطف سالم” اثناء امتحانات القبول بالمعهد ومن هنا كانت بداية تحقيق الحلم.
، “فيلم النمرالأسود” هل يعتبر أول اعمالك الفنية؟
،، أيوة ولم يسبق لي أي تجارب فنية اخري وده كان بالنسبة لي شئ مش سهل.
،الجميلة وفاء سالم تعتبر إختيار المخرج “عاطف سالم” لكِ مغامرة لإسناده دور البطولة أمام الفنان “أحمد زكي” في فيلم النمر الأسود؟
،،المخرج”عاطف سالم” مش أول مره يقدم وجه جديد في أعماله فهو معروف عنه تقديم الوجوه الجديدة لأنه مخرج كبير ومتمكن من ادواته ويقدر يحدد الوجه الجديد اللي هيقدمه مناسب ولا غير مناسب وبالتالي المغامرة هنا نقدر نسميها مغامرة محسوبة وخصوصاً انه اعتمد علي وجود ممثل عبقري بقيمة الفنان أحمد زكي ليساعدني في أداء المهمة الصعبة.
،معني هذا أنكِ قد قابلتك صعوبات اثناء تصويرك أول اعمالك فيلم النمر الأسود؟
،،اثناء الإعداد للفيلم أنا كنت في سنه أولي في المعهد وسافرت بلدي سوريا في الأجازة وهناك الاجازة اشتغلت مذيعة في التليفزيون السوري علي سبيل التجربة. وقتها مكنش في ذهني اني اكون مذيعة كانت مجرد صدفة لم اسعي لتحقيقها لكنها افادتني كثيراً في مجال التمثيل كسرت حاجز الرهبة والخوف في داخلي من الكاميرا وكمان وجودي امام فنان متمكن عملاق زي احمد زكي ساعدني في الإندماج لانه بيعرف يعمل الايهام بالواقع بيخليكي تصدقيه كل ما بيكون امامك فنان جيد بيخدك ويطلع لانه ماشي علي تراك مضبوط
والفنان احمد زكي ساعدني بتلقائيتة في الأداء. فلاقيت نفسي تلقائية زيه باخد منه. عشان كده مكنش في صعوبات إلي حد ما، كمان انا في الفيلم كنت بصمم ملابسي بنفسي وعملت لشخصيتي ابعاد وبكده قربت منها ،كل ما اشتركتي مع عناصر العمل الفني بنفسك كل ما تمكنتي من النجاح دا احسن كتير من ان الممثل ياخد ورقه مكتوب فيها مشهد ويدخل يمثل. زاد علي كده انه كان معي مخرج كبير ساندني.
والفنان احمد زكي ساعدني بتلقائيتة في الأداء. فلاقيت نفسي تلقائية زيه باخد منه. عشان كده مكنش في صعوبات إلي حد ما، كمان انا في الفيلم كنت بصمم ملابسي بنفسي وعملت لشخصيتي ابعاد وبكده قربت منها ،كل ما اشتركتي مع عناصر العمل الفني بنفسك كل ما تمكنتي من النجاح دا احسن كتير من ان الممثل ياخد ورقه مكتوب فيها مشهد ويدخل يمثل. زاد علي كده انه كان معي مخرج كبير ساندني.
،ما الاقرب لقلبك التمثيل في السينما،التليفزيون،الاذاعة؟
،،كل ميديا لها سحرها ولها جمالها مفيش مجال اشتغلت في إلا وله سحر وعبق أنا بحبهم كلهم لكن طبعا السينما طول الوقت انا بحن لها لأنها اهدتني النجوميه وطبعاً انابحن للي اداني اكتر انا غرفت ولازلت بغرف منها حب الناس بالإضافه إلي اننا عارفين أن السينما هي وثيقة. اما الدراما التليفزيونيه نادراً ما تعلق في الذاكرة مثل الفيلم السينمائي .
،ما هو سبب اختفاء وفاء سالم بعد فيلم “النمر الأسود” ؟
والله دا سؤال انا دايما بسأله لنفسي ومش لاقيه له إجابه واضحة ممكن تكون الأعمال اللي اتعرضت عليا بعده ماكنتش مشجعه إني أكون بنفس القوة والحماس لكن حبي للتمثيل خلاني مش قادره اسيبه حتي لو كنت موجوده في اعمال بسيطه عارفه ان ده مش عذر قوي لكن هي دي الحقيقة.
،من خلال فترة عملك في السينما والتليفزيون واجهت حروباً داخل الوسط؟
اكيد اكيد اكيد طبعا ،انا محارب فاشل، انا مقاتل ضعيف، انا كل اللي بعرف اعمله إني اشتغل الأعمال اللي اقدر اعملها عموما الذاكره لاتحمل الا الأشياء الجميلة وأنا مبحبش اتكلم عن مواقف بعينها .
،اغلب ادوارك تعبر عن المراة الجميلة الطيبة الارستوقراطية هل معني كده انك مبتحبيش تمثلي دورالشريرة وهل عندك القدره علي الظهور بدون مكياج في اعمالك؟
،،اه جدا جدا رب العزة فطرنا علي الفجور والتقوي وانا بحب اغوص في النفس البشرية بكل ابعادها. انا كممثله بستمتع أني اتحرك في كل الاتجاهات وفي دوري في مسلسل”جراب حواء” في حلقة من الحلقات كنت بلعب دور أم قعيده بدون مكياج تماماً وفي حلقة اخري كنت بلعب شخصية شريرة بتقتل وتدفن الجثه في الجنينه بدم بارد.
،من خلال مسيرتك الفنيه هل تعاملتي مع موهبتك بذكاء؟
،،في الحقيقة لا العبرة بالنتائج انا معملتش اعمال عظيمة اللي كنت اتمني اعملها واكيد العيب مش في الأخرين انا موديه والنجاح عايز إنسان لا يغفل.
،،في الحقيقة لا العبرة بالنتائج انا معملتش اعمال عظيمة اللي كنت اتمني اعملها واكيد العيب مش في الأخرين انا موديه والنجاح عايز إنسان لا يغفل.
،ما رأيك في تصريحات الفنان محمد رمضان من فترة بخصوص اقتناءة عدد من السيارت وردوده علي اصدقائه من الوسط الفني؟
،، الموضوع ده اثار استياء الناس مع انه ممكن يكون حافز ليهم في نفس الوقت لأن محمد رمضان نجاحه في سنه الصغير ده لأزم يكون نموزج للشباب بانهم ينجحوا. واللي عنده موهبه او طموح yes we can- يقدريوصل للنجاح محمد رمضان نموزج زي قصة بطل ” النمر الأسود” ازاي قدريبقي من اثري اثرياء العالم وهو اُمي لا يقراء ولا يكتب دا الجانب الإيجابي اللي لازم نشوف رمضان من خلاله .
،ما هي وجهة نظرك أن البعض يُقبل بشغف علي مشاهدة المسلسلات المدبلجة باللهجة السوريه؟
،،لان المسلسلات دي متقنة الصنع عشان كده نجحت وكمان الدبلجة كان بيقوم بأدائها كبار الفنانين المحترفين فالناس حبت اللهجة لو الاعمال كانت رديئة مكنش حد حبها.
دا غير ان في رباط سحري بين الشعب السوري والمصري الشعبين دول هم الاقرب لبعض غير المغرب العربي ودول الخليج الحقيقة في بينهم كمياء عجيبه.
،من هم اكتر المخرجين والفنانين اللي بتفضلي تتعملي معاهم ؟
انا بحب المخرج المتمكن من ادواته. وفي دلوقت جيل جديد بيقدم اعمال مهمه من الشباب الطموح أنا فرحانه بيهم لانهم لهم رؤيه جديده زي د/ بيتر ميمي وفي مخرجين مااسعدنيش الحظ اني اشتغل معاهم لكن اكيد بتمني إن دا يحصل زي شريف عرفة ،محمد ياسين اللي كان اخر اعماله “افراح القبه” كان حقيقي عمل رائع وفي كمان هاني خليفه احدث اعماله كان “فوق مستوي الشُبهات” قدم فيه الفنانة يسرا بشكل جديد واداء مختلف عملت دور الشر بمهارة تحت قيادة مخرج فاهم زيه
اما بالنسبة للفنانين لو موجود قصادي حد ملأئم هكون سعيدة مقدرش اختار حد بعينه، يمكن إجابتي تكون ديبلوماسيه لكن هي دي الحقيقة “الدور بينادي صاحبه”
،إيه اللي شاغل وفاء سالم فنياً ؟
،، صورت الاجزاء الخاصة بي في مسلسل افراح ابليس وبستعد لتصوير الجزء التاني من مسلسل ” الأب الروحي” وهو من المسلسلات المهمة انتاج شركة كبيره شركة “فنون مصر” اخرج الجزء الاول مخرج واعد اسمه الدكتور “بيتر ميمي” تأليف أ.هاني سرحان وكان معايا كوكبه كبيره من اهم النجوم علي رأسهم مع حفظ الألقاب “محمود حميده،سوسن بدر،أحمد عبد العزيز،أحمد فلوكس”
ووجوه شابه كتيرة لان الموضوع بيتيح الفرصه لظهور واكتشاف مواهب ووجوه جديده انا شايفه ان العمل ده من اهم الاعمال اللي اشتركت فيها من فتره كبيرة وإن شاء الله الجزء الثاني ينال اعجاب المشاهدين ونستكمل باقي الاجزاء، بالنسبة للسينما في اعمال بقراها لكن لسه موصلتش لقرارات وربنا يوفقني اني اعمل اعمال ترضي جمهوري وطموحاتي الفنيه.
، الجميلة وفاء سالم ياتري ليكي طقوس معينه قبل دخولك اي عمل فني؟
،، الطقوس بالنسبة ليا هي التحضير قبل أي عمل بيخليني ادخل في إيهاب الشخصية بدءاً من قرائتي للنص وبعدين ملابس الشخصيه وبعدين history) ) تاريخ الشخصية ، عموماً في الوقت ده بتحرك في صمت وببدأ ابعد عن اصدقائي ومن حولي حتي اقرب الناس لي، ببني عالم خاص من العزلة وبلاقيني تقوقعت جوه الشخصية، مبحبش اتكلم عن شغلي ولا اقول هعمل ايه لاني لما بتكلم بحس اني استنفذت طاقتي في الكلام ومبعرفش اجمعها امام الكاميرا.،
هل تقبلي ان تكتب الصحافة عن حياتك الشخصيه ام هي خط أحمر؟
،،ولله لو الصحافة عرفت تعمل كده يبقي برافو عليهم لكن لا اُمكنهم مني.
،ازاي بتعرفي تعملي ده انتي شاطرة اوي كده؟
” انا فنياً بكون حريصا اني اكون عند حسن ظن جمهوري سواء في حياتي الشخصية او اعمالي الفنيه علي اد ما اقدر وبحاول ادرأ بواطن الشبهات وبكده متقدريش تتمكني إنك تصطادي لي اخطاء “وجلا من لا يخطئ طبعا”
،تفتكري الأمومة هي كانت السبب الحقيقي في تعطيل مسيرتك الفنية؟
،، في مرحلةً ما اكيد كل الممثلات الأمهات تراجعوا عن دورهم في النجاح شويه لكن مقدرش احمل امومتي العبء الكبير ده، انا مش سوبر ماما أنا زي اي أم كنت بشتغل وكنت سعيده بأمومتي وفي نفس الوقت عايزه أكون أنا، انا طماعه بجمع ما بين متناقضات كثيرة ما بين الطموح والجموح والتراجع فأنا نادمة طول الوقت علي كل العسرات التي مريت بها وبحمل نفسي مشكلة تقوقعي.
،ازاي كان شعورك اول ما قرر إبنك المخرج الشاب” أدهم الشريف” يدخل المجال الفني ويتخصص في الإخراج شجعتيه ؟
،،ايوه طبعا انا كنت سعيده جدا لاني حسيت اني اختارت الطريق الصح في دخولي للمجال الفني واللي هيكمله إبني
،ايه كان شعورك لما شوفتي أبنك بيستلم أول جائزة من عمله كمخرج؟
،، حسيت انه عوضني عن سنين انتظاري لنفسي بأني اكون فنانه ليها اعمال مهمه انا اخدت جائزة واحدة في حياتي مهمة عن فيلم “النمر الأسود” وبعد كده معملتش أعمال تستحق الجوائز لما أبني أخد الجائزة حسيت انه بيكملني وأنه امتداد ليا وان الاعمال دي تخصني حقيقي تفوقه فرحني فرحة ملهاش وصف، في لحظة معرفتش افرق بين ان دي جائزته هو ولا جائزتي. اختلطت وقتها عليا الأمور.
،ممكن نشوفك قريب في عمل واحد يجمع بينك وبين ابنك المخرج الشاب أدهم الشريف؟
،، بتمني طبعاً أنا اشتغلت مع أبني مره واحده في مشروع تخرجه من معهد السينما كنت ضيفة شرف ومع ذالك حسيت أني وانا معاه بأدي أجمل الأعمال واعلي البطولات أنا بتمني أدهم يقولي اكشن.
،نفسك تكوني جدة؟
،،طبعا ياريت وهابقي طفلة كمان اكتر منهم انا بحب الأطفال اوي وخصوصا لو احفادي من ابني.
،أنتي منفصله من مدة طويله معقول مقابلتيش حد يخطف قلبك ويخليكي تقبلي ترتبطي بيه لحد دلوقت ؟
،، تصدقي أنا فعلاً محدش عرف يخطفني أو جايز أنا غير قابله للخطف وجايز أنا مش عايزة اتخطف. في نفس الوقت أنا بحب الرومانسيه ومشاعري لسه مارحتش لحد، تقدري تقولي عليا صعبة التوافق مع الأخرين.
،وياتري ايه مواصفات سعيد الحظ اللي ممكن تحبيه؟
،،اللي بتجتمع فيه المعاني النبيله من الوضوح، الكبرياء، الحكمه، الكرم دي المواصفات اللي ممكن تشدني للرجل إلي جانب الكيمياء طبعا والأشياء المشتركه بينا لازم يبقي شبهي ومشاعره راقيه ورقيقة ومش لازم يلفت نظري اي شخص مهما بلغ من ثقافة ومعرفه، الثقافة والمعرفه ماليه الارفف والكتب.
،ممكن ترتبطي بحد أقل منك مادياً واجتماعياً؟
،، انا بفضل التكافأ والمستوي يكون قريب علشان محسش اني مع راجل أقل مني ومش ممكن هرتبط بحد لسه بيدأ حياته الكلام ده لو سني لسه صغير أنا وصلت لمرحله عمريه بتحتم عليا ان يكون الشخص اللي هرتبط به مناسب كمان.
،ايه موقع كلمة الندم في حياتك؟
،،ندمت كتير جدا كل العسرات والفشل اللي فشلته في حياتي ندمت عليه ولو رجع بيا الزمن اتمني مكررش اخطائي وإلا ” من هو الأحمق”
،لو كنتي في زمن ماضي من هي الشخصيه اللي ممكن تكوني روحها؟ ولماذا؟
،، ملكة سباء
لقوة شخصيتها وشجاعتها وذكائها.
،لما بتحزني والدنيا بتضيق عليكي مين بيمسح دموعك؟
،،انا ….. ولي اصدقاء قريبين لقلبي هما اللي بتكلم معاهم وبيمسحو دموعي .
،في سؤال اتمنيتي ان يسأله لكي صحفي ولم يسأل حتي الأن؟
،،الحقيقة مفيش ولا سؤال أحب إني اتسأله انا مبحبش طول الوقت اتكلم احب تشوفيني علي الشاشه بأعمالي وردودي لازم تكون عمليه مش مجرد كلام
، ايه المقولة اللي بتؤمني بيها ؟
“ما ندمت علي السكوت مرة بقدر ما ندمت علي الكلام مراراً”
،ممكن تمثلي لغاية امتى؟
،،لغاية آخر نفس في عمري
فعلا فنانة خساسة ونقية جدا
شكرا سخر الحياة