2054208194886930964305459023536687124329124620425345324432245227212526005525430010231005910972575227800005423858567245242500231905922702611555

3/22/2018

كيف نصل بإبنائنا لبر الأمان



كيف نصل بإبنائنا  لبر الأمان


بقلم / ريهام محمود
مهتمة بالصحة العامة والاسرة

أكترحاجة بتشغلنا وبنفكر فيها طول الوقت هى أزاى نربى ولادنا بطريقة صحيحة ، ازاى نعدى بيهم كل المراحل الصعبة اللى بيمروا بيها ونوصل بيهم لبر الامان ،لان ده بالنسبة لأى ام هو النجاح الحقيقى فى حياتها .

فى حاجات كتير لازم ناخد بالنا منها ونركز عليها فى رحلة تربيتنا لاولادنا ومن أهم الحاجات دى :

• ولادك أصحابك

يعنى لازم تصاحبى أولادك علشان يبقوا كتاب مفتوح قدامك لأنه مينفعش يكون فيه تفاصيل فى حياتهم إنتى مش عارفة عنهم حاجة بس طبعا من غير ميحسو إنك بتقتحمى خصوصيتهم .

وعلشان ده يحصل لازم يحسوا إنك صحبتهم بجد وأقرب حد ليهم ، يعنى لازم تسمعيهم دايما و كل تركيزك يكون معاهم لما يتكلمو معاكى حتى لو الموضوع اللى بيتكلمو فيه ده بالنسبالك بسيط أوتافه بس بالنسبة ليهم بيكون موضوع مهم لان كل كلمة بيقولوها حتى لو بسيطة بتعبر عن حاجة جواهم .

بلاش تصادرى على كلامهم خليهم يقولو كل اللى هما عاوزين يقولوه حتى لو كان غلط أو عيب وبعدين اتكلمى معاهم وفهميهم بهدوء وحاولى دايما كلامك يوصل لقلبهم قبل عقلهم .

خدى بالك انك لو مسمعتيهمش هيدوروا على حد تانى يسمعهم وغالبا بيكونو الاصحاب اللى للاسف مش دايما بيكونوا الاشخاص المناسبين للمهمة دى بالعكس دول ممكن يشجعوهم على حاجات كتير غلط وطبعا الولاد هيحبو ده اوى وهتلاقى المسافة بتبعد بينك وبين اولادك جدا وتلاقى نفسك فعلا مش عارفة عنهم حاجة وده بيكون اسرع طريق لضياع اولادنا .

• مش طول الوقت نقد

مينفعش طول الوقت تحسسى أولادك أن كل حاجة بيعملوها غلط، لازم تديهم ثقة فى نفسهم حتى لو عملوا حاجة صغيرة اوى صح انتى كبريها وحسسيهم انها حاجة عظيمة وكفئيهم عليها كمان .

بلاش نقد وتأنيب طول الوقت على كل كبيرة وصغيرة ،طبعا العقاب مهم بس الاهم انه يكون العقاب على قد الغلط بدون مبالغة .

اللى عاوزة أقوله إنك زى مبتكرهى أولادك فى الغلط مهم جدا انك تحببيهم فى الصح علشان هما اللى يدوروا على الصح بعد كده ويعملوه .

• عرفيهم قد إيه بتحبيهم

جميل انك تعرفى ولادك دايما قد ايه انتى بتحبيهم ، اكبر غلط بجد انك متعبريش ليهم عن كل الحب اللى جواكى .

حبك ليهم موجود مش لسة هتدورى عليه كل المطلوب انك متبخليش عليهم بالتعبير عن الحب ده .

كيف نصل بإبنائنا  لبر الأمان

• الدلع مش حاجة عيب

مش عيب تدلعى ولادك على طول ومش عيب تلعبى معاهم وتعملى اى حاجة تقربك منهم اكتر ، المهم ان كل حاجة تبقى معمولة صح هتتعمل ازاى وامتى.

لما ولادك يحسو بحبك قوى طول الوقت هيبقى اكبر عقاب ليهم ممكن يأثر فيهم هو انك تزعلى منهم ولو ده حصل يبقى انتى ماشية على الطريق الصح مع اولادك .

• اشركيهم معاكى

بلاش تبعدى ولادك عن ظروف البيت حتى لو كانت صعبة ، يعنة مينفعش دايما طلباتهم تكون مجابة لو ده فوق طاقتك ،كلنا بنيجى على نفسنا اوى علشان نسعد اولادنا ونحقق لهم مطالبهم بس واحنا بنعمل ده لازم نفهمهم ونعرفهم ان فى اولويات ونخليهم يشاركونا فى ترتيب الاولويات دى .

بلاش نظام اطلب تجاب لانه ممكن يبسطهم دلوقتى بس اكيد هيتعبهم بعدين لما يلاقوا ان الدنيا مش سهلة اوى كدة وكمان علشان منعلمهمش الانانية من غير منحس لانهم اتعودو إن طلباتهم مجابة حتى لو على حساب ظروف البيت أو أى شخص تانى .

معلش خليهم يتعبوا شوية دلوقتى واحنا معاهم علشان يرتاحو بعد كدة وهما لوحدهم .

كيف نصل بإبنائنا  لبر الأمان

طبعا تربية أولادنا موضوع كبير جدا بس أنا حبيت اشارك معاكم اهم الحاجات اللى اتعلمتها من خلال تجربتى مع اولادى .

أخر حاجة عاوزة أقولها لكل أم وكل أب ربوا أولادكم بالحب لأنه أسهل الطرق علشان تحافظوا على أولادكم ،حبوهم وعبروا عن حبكو واملو البيت دفا وحب علشان توصولوا بيهم لبر الامان .

رئيس قسم صحتك بالدنيا / نهى على
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين