كتبت / شيرين حمزة
هيجي عليكي يوم وتحسي نفسك انك كبرتي قبل فوات الاوان ،هتحسي نفسك انك مالحقتيش تعملي اي حاجه انتي نفسك فيها فجأه هتلاقي نفسك كبرتي شيلتي مسئوليه بيت واسره واولاد وزوج وان ازاي البيت يمشي وازاي تربي اولادك ،وفي نفس الوقت تعملي كل حاجه للراجل اللي انتي عايشه معاه عشان مايروحش يبص بره وتفضلي تيجي ع نفسك من كل ناحيه عشان تطلعي صورة جميلة مافيهاش اي ديفوه بس للأسف الصورة مش مكتملة مع أن الصورة هتبقي انتي فيها بس مش مكتملة ،لأنك كلك شروخ وضغط وإرهاق وعدم اتزان هتلاقي ملامح وشك كلها تجاعيد كلها غيوم تحت عينك غامق من قلة النوم هتلاقي نفسك مش موجودة غير بس في صورة جميلة انتي السبب في تكونها عشان بس الناس تقول انك ماقصرتيش ،لكن الكارثة الكبيرة انك مقصرة في حق نفسك بزيادة ،شوفتي كل واحد محتاج ايه وعايز ايه وعملتيه حتي من قبل ما يطلب الحاجة ونسيتي نفسك خالص ،بس اقولك ماتستقريش لأن هيجي عليك وقت وهتكرهي نفسك وحياتك لأن مافيش جديد،بصي على كل خليه فيكي هتلاقيها محتاجه اهتمام محتاجة تجديد مش ترميم خلي الراجل اللي معاكي يفكر فيكي زي ماانتي بتفكري فيه ،اهتمي بنفسك ع قد ماتقدري عيشي حياتك يوم بيوم متأجليش حاجة لليوم اللي بعده عشان مش هتحصل زي مابتفكري تعملي اسرة ناجحة لازم تكوني انتي ناجحة من جواكي وراضية عن نفسك مانجيش عليها عشان خاطر اي سبب ،شوفي ايه اكتر حاجة بتحبها ونميها وانجحي فيها هتحتسي نفسك انك راضية عن نفسك وسعيدة جدا من جواكي اوعي تكوني في يوم من الأيام بعض خلايا متبقيه من انثي ،بصي لكل تفصيله فيكي قبل فوات الأوان.
